काठमाडौं । भारत भ्रमणमा रहनुभएका नेपालका अर्थमन्त्री डा. स्वर्णिम वाग्ले र भारतकी अर्थमन्त्री निर्मला सीतारमणबीच भेटवार्ता भएको छ ।
नयाँ दिल्लीस्थित कर्तव्य भवन परिसरमा रहेको भारतीय वित्त मन्त्रालयमा बिहीबार अपराह्न ५ बजे दुई अर्थमन्त्रीबीच भेटवार्ता भएको हो ।
भेटवार्तामा नेपाल र भारतबीचको आर्थिक तथा वित्तीय सम्बन्ध, आपसी सहकार्य र दुई देशबीच आर्थिक क्षेत्रमा अघि बढाउन सकिने सम्भावित सहकार्यका विषयमा छलफल भएको जनाइएको छ ।
भेटमा दुवै देशका सरकारी प्रतिनिधिमण्डलका सदस्यहरूको समेत सहभागिता रहेको थियो । दुवै पक्षबीच आर्थिक विकास, लगानी, व्यापार तथा वित्तीय सहकार्यका विषयमा विचार आदानप्रदान भएको बताइएको छ ।
नेपाल र भारतबीच लामो समयदेखि व्यापार, लगानी, ऊर्जा तथा पूर्वाधारलगायत विभिन्न क्षेत्रमा सहकार्य हुँदै आएको छ । दुई देशका अर्थमन्त्रीबीच भएको पछिल्लो भेटवार्तालाई आर्थिक सम्बन्ध तथा द्विपक्षीय सहकार्यका विषयमा उच्चस्तरीय छलफलका रूपमा हेरिएको छ ।
भारत भ्रमणका क्रममा अर्थमन्त्री वाग्लेले भारतीय सरकारका सम्बन्धित अधिकारी तथा अन्य सरोकारवालासँग समेत भेटवार्ता गर्ने कार्यक्रम रहेको छ । नेपालले भारतसँग आर्थिक सहकार्य विस्तार, व्यापार सहजीकरण तथा विकासका क्षेत्रमा थप साझेदारीका विषयलाई प्राथमिकतामा राख्दै आएको छ ।
भेटवार्तामा सहभागी दुवै देशका प्रतिनिधिमण्डलका सदस्यहरूले नेपाल–भारत आर्थिक सम्बन्धलाई थप प्रभावकारी बनाउने विषयमा छलफल गरेका थिए ।
