काठमाडौं । प्रधानमन्त्री वालेन्द्र शाह र नेपालका लागि अमेरिकी दूतावासकी कार्यवाहक राजदूत मेगन बोल्डिनबीच शिष्टाचार भेटवार्ता भएको छ। सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा नेपाल–अमेरिका सम्बन्ध, जलवायुजन्य विपद्, पर्यटन तथा लगानीका विषयमा छलफल भएको हो।
भेटका क्रममा प्रधानमन्त्री शाहले पछिल्लो समय नेपालमा देखिएको जलवायुजन्य विपद्का जोखिम न्यूनीकरण तथा त्यसबाट हुने क्षति कम गर्न अन्तर्राष्ट्रिय सहकार्य र सामूहिक प्रयासलाई थप प्रभावकारी बनाउनुपर्नेमा जोड दिनुभयो।
प्रधानमन्त्री शाहले नेपालको पर्यटन क्षेत्रमा रहेको सम्भावनाबारे पनि चर्चा गर्नुभयो। पर्यटनको विकासबाट नेपाल र अमेरिकाबीच पारस्परिक लाभ लिन सकिने उल्लेख गर्दै उहाँले नेपालमा अमेरिकी लगानी बढाउन प्रोत्साहन गर्न कार्यवाहक राजदूत बोल्डिनसँग आग्रह गर्नुभयो।
भोटेकोशी बाढीपछि उत्पन्न कठिन परिस्थितिमा अमेरिकाले नेपाललाई दिएको सहयोग र देखाएको ऐक्यबद्धताप्रति प्रधानमन्त्री शाहले धन्यवाद व्यक्त गर्नुभयो। बाढीका कारण नेपाली नागरिकसँगै विदेशी नागरिकसमेत प्रभावित भएको उल्लेख गर्दै उहाँले प्रभावित सबैप्रति दुःख व्यक्त गर्नुभयो।
यसअघि पनि कार्यवाहक राजदूत बोल्डिनले परराष्ट्रमन्त्री शिशिर खनालसँग भेटवार्ता गर्दै भोटेकोशी बाढीबाट प्रभावित नेपाललाई राहत, पुनःस्थापना र पुनर्निर्माणका काममा सहयोग गर्न अमेरिकी सरकार तयार रहेको बताउनुभएको थियो।
भेटमा कार्यवाहक राजदूत बोल्डिनले बाढीबाट भएको जनधनको क्षतिप्रति दुःख व्यक्त गर्दै प्रभावित परिवार तथा समुदायप्रति समवेदना प्रकट गर्नुभयो। उहाँले कठिन परिस्थितिमा नेपाल सरकार र नेपाली जनताप्रति अमेरिकी सरकारको ऐक्यबद्धता रहेको बताउनुभयो।
बोल्डिनले बाढी प्रभावित क्षेत्रमा राहत, पुनःस्थापना तथा पुनर्निर्माणका प्रयासमा सहयोग र सहकार्य गर्न अमेरिकी सरकार तयार रहेको जानकारी दिनुभयो।
यस भेटवार्तालाई पछिल्लो विपद्पछि नेपाललाई प्राप्त भइरहेको अन्तर्राष्ट्रिय सहयोग तथा नेपाल–अमेरिका सम्बन्धका विभिन्न पक्षमा छलफल गर्ने अवसरका रूपमा हेरिएको छ। अमेरिकाले यसअघि भोटेकोशी बाढीपछि मानवीय सहायता तथा विपद् प्रतिकार्यमा सहयोग परिचालन गरिरहेको जनाएको छ।
