एजेन्सी । अमेरिकी राष्ट्रपति डोनाल्ड ट्रम्पले इरानसँग जारी युद्ध आगामी नोभेम्बर ३ मा हुने अमेरिकी मध्यावधि चुनावलगत्तै अन्त्य हुने दाबी गर्नुभएको छ। उहाँले अमेरिकी चुनावलाई प्रभावित पार्ने उद्देश्यले इरानले युद्ध लम्ब्याउन खोजिरहेको आरोपसमेत लगाउनुभएको छ।
राष्ट्रपति ट्रम्पले बुधबार राति पत्रकारहरूसँग कुरा गर्दै अमेरिकी आर्थिक तथा सैन्य दबाबका कारण इरान लामो समयसम्म युद्धमा टिक्न नसक्ने दाबी गर्नुभएको हो। उहाँका अनुसार आगामी मध्यावधि चुनावपछि युद्ध तत्काल अन्त्य हुने सम्भावना रहेको छ।
ट्रम्पले इरानले अमेरिकी चुनावको परिणाम आफूअनुकूल बनाउन युद्धलाई लम्ब्याउने प्रयास गरिरहेको आरोप लगाउनुभएको छ। उहाँका अनुसार युद्धका कारण अमेरिकी मतदातामा असन्तुष्टि बढाउने र त्यसको राजनीतिक लाभ लिँदै रिपब्लिकन पार्टीलाई कमजोर बनाउने रणनीति इरानले अपनाइरहेको छ।
यद्यपि, राष्ट्रपति ट्रम्पले इरानसँग पुनः वार्ता हुने सम्भावनालाई भने पूर्ण रूपमा अस्वीकार गर्नुभएको छैन। उहाँले दुई देशबीच वार्ता सम्भव रहेको बताउँदै हाल अमेरिकी प्रशासन त्यसका लागि सक्रिय रूपमा अघि नबढेको स्पष्ट पार्नुभएको छ।
यसअघि इरानको आणविक कार्यक्रमलाई लिएर अमेरिका र इरानबीच भएका वार्ताहरू निष्कर्षमा पुग्न नसकेपछि दुई देशबीचको तनाव थप चर्किएको थियो। आणविक कार्यक्रमकै विषयलाई लिएर लामो समयदेखि अमेरिका र इरानबीच विवाद रहँदै आएको छ।
राष्ट्रपति ट्रम्पले इरानसँग भविष्यमा हुने सम्भावित सम्झौता केवल आणविक कार्यक्रममै सीमित नहुने संकेतसमेत गर्नुभएको छ। उहाँका अनुसार कुनै पनि नयाँ सम्झौतामा आणविक कार्यक्रमबाहेक अन्य महत्वपूर्ण विषयहरूलाई समेत समेटिनेछन्।
अमेरिकी पक्षले इरानलाई आणविक हतियार विकास गर्नबाट रोक्नु आफ्नो प्रमुख उद्देश्य रहेको बताउँदै आएको छ। अमेरिका इरानको आणविक गतिविधिलाई लिएर लामो समयदेखि चिन्तित रहँदै आएको छ र तेहरानमाथि विभिन्न प्रकारका आर्थिक तथा राजनीतिक दबाबसमेत दिँदै आएको छ।
उता, इरानले भने आफ्नो आणविक कार्यक्रम शान्तिपूर्ण प्रयोजनका लागि मात्र भएको दाबी गर्दै आएको छ। इरानले आणविक हतियार निर्माण गर्ने उद्देश्य नरहेको बताउँदै आफ्नो आणविक गतिविधि ऊर्जा तथा अन्य नागरिक प्रयोजनका लागि भएको दाबी गर्दै आएको छ।
अमेरिका र इरानबीचको पछिल्लो सैन्य तनावले अन्तर्राष्ट्रिय स्तरमा समेत चिन्ता बढाएको छ। दुई देशबीचको संघर्ष लम्बिँदै जाँदा मध्यपूर्वको सुरक्षा अवस्था थप जटिल बन्न सक्ने आशंका गरिएको छ।
युद्धका कारण तेलको उत्पादन तथा ढुवानी प्रभावित हुन सक्ने भएकाले अन्तर्राष्ट्रिय बजारमा कच्चा तेलको मूल्यमा समेत दबाब पर्न सक्ने चिन्ता बढेको छ। ऊर्जा बजारमा देखिने अस्थिरताले इन्धनसँगै ढुवानी लागत र विभिन्न उपभोग्य वस्तुको मूल्यमा समेत असर पार्न सक्ने सम्भावना रहेको छ।
राष्ट्रपति ट्रम्पको पछिल्लो अभिव्यक्तिले भने युद्ध अन्त्यका लागि राजनीतिक तथा कूटनीतिक बाटो खुला रहेको संकेत गरेको छ। तर युद्ध कहिले र कसरी अन्त्य हुन्छ भन्ने विषयमा स्पष्ट कार्ययोजना सार्वजनिक नभएकाले आगामी दिनमा अमेरिका–इरान सम्बन्ध कुन दिशामा अघि बढ्छ भन्ने विषयलाई अन्तर्राष्ट्रिय समुदायले चासोपूर्वक हेरिरहेको छ।
