काठमाडौँ । रसुवामा यही भदौ १० गते भोटेकोशी नदीमा आएको विनाशकारी बाढीबाट प्रभावित नागरिकको उद्धारकार्य तीव्र पारिएको छ । बाढीका कारण विभिन्न स्थानमा फसेका तथा जोखिममा परेका नागरिकलाई नेपाली सेनाले हेलिकप्टरमार्फत सुरक्षित स्थानमा उद्धार गरिरहेको छ ।
नेपाली सेनाका अनुसार आज दिउँसो १ः३० बजेसम्म हेलिकप्टरमार्फत ३३० जना प्रभावित नागरिकलाई सुरक्षित स्थानमा उद्धार गरिएको छ । कठिन भौगोलिक अवस्था तथा बाढीका कारण सडक र स्थलमार्ग प्रभावित बनेपछि हवाई उद्धारलाई प्राथमिकता दिइएको हो ।
बाढीबाट प्रभावित क्षेत्रमा खोज तथा उद्धारका लागि नेपाली सेनाले ठूलो सङ्ख्यामा जनशक्ति परिचालन गरेको छ । सेनाका अनुसार उद्धारकार्यलाई व्यवस्थित र समन्वयात्मक रूपमा अघि बढाउन ८ हजार ९०० भन्दा बढी सैनिक जनशक्ति प्रत्यक्ष रूपमा प्रभावित क्षेत्रमा खटिएका छन् ।
जलविद्युत् आयोजनाका सुरुङमा खोजी तीव्र
बाढीका कारण विभिन्न जलविद्युत् आयोजनाका सुरुङमा मानिसहरू फसेको आशंकापछि नेपाली सेनाले प्राविधिक तथा विज्ञ टोली परिचालन गरेको छ ।
सेनाका अनुसार त्रिशूली–३ जलविद्युत् आयोजनाको सुरुङमा करिब १५ मिटर तल ओर्लिएर उद्धार टोलीले खोज तथा उद्धारको काम गरिरहेको छ । सुरुङभित्रको अवस्था जोखिमपूर्ण रहेकाले आवश्यक सुरक्षा तथा प्राविधिक उपाय अपनाउँदै टोलीले काम अघि बढाइरहेको छ ।
त्यस्तै, त्रिशूली–३ बी (३घ) जलविद्युत् आयोजनाको सुरुङमा पनि नेपाली सेनाको विज्ञ फौजसहितको टोलीले खोज तथा उद्धार कार्यलाई निरन्तरता दिएको छ ।
सुरुङभित्र फसेका व्यक्तिको अवस्था यकिन गर्न तथा सम्भावित स्थानमा पुग्न प्राविधिक जनशक्ति र आवश्यक उपकरण प्रयोग भइरहेको सेनाले जनाएको छ ।
रसुवागढी हाइड्रोपावरको सुरुङमा पनि खोजी
रसुवागढी हाइड्रोपावरको सुरुङमा पनि सुरक्षाकर्मीको संयुक्त टोलीले खोजतलास गरेको थियो । नेपाली सेनाका अनुसार टोली सुरुङभित्र करिब २५० मिटरसम्म प्रवेश गरी खोजीमा जुटेको थियो ।
तर उक्त क्षेत्रमा खोजी गर्दा कोही पनि फेला नपरेपछि टोली बाहिर फर्किएको सेनाले जनाएको छ । सुरुङ तथा अन्य जोखिमयुक्त संरचनामा सम्भावित रूपमा फसेका व्यक्तिको अवस्थाबारे यकिन गर्न खोज तथा उद्धार कार्यलाई निरन्तरता दिइएको छ ।
घर–घर पुगेर खोजी र राहत
बाढी प्रभावित क्षेत्रमा नेपाली सेनाका टोलीले नदी तथा खोला किनार, पहाडी क्षेत्र र स्थानीयवासीका घर–घरमा पुगेर खोजी तथा उद्धार गरिरहेका छन् ।
नेपाली सेना श्रीनाथ गणका अनुसार जोखिममा रहेका नागरिकको पहिचान गरी सुरक्षित स्थानमा सार्ने, बेपत्ता व्यक्तिको खोजी गर्ने तथा आवश्यक राहत उपलब्ध गराउने कामलाई एकीकृत रूपमा अघि बढाइएको छ ।
बाढीका कारण सडकमार्ग अवरुद्ध भएका तथा कतिपय स्थानमा स्थलमार्गबाट पुग्न कठिन भएका कारण हेलिकप्टरमार्फत उद्धारलाई पनि प्रभावकारी रूपमा प्रयोग गरिएको छ ।
ठूलो सङ्ख्यामा सुरक्षा जनशक्ति परिचालन
भोटेकोशी बाढीपछि रसुवामा खोज, उद्धार तथा राहतकार्यका लागि नेपाली सेनाले ठूलो सङ्ख्यामा जनशक्ति परिचालन गरेको छ । ८ हजार ९०० भन्दा बढी जनशक्ति प्रत्यक्ष रूपमा खटिएर प्रभावित क्षेत्रमा उद्धार, खोजी तथा राहतका काम गरिरहेका छन् ।
सेनाले विशेषगरी बाढीबाट प्रभावित खोला किनार, पहाडी क्षेत्र, जोखिमयुक्त संरचना तथा बस्तीमा केन्द्रित भएर खोजी गरिरहेको जनाएको छ ।
बाढीका कारण ठूलो जनधनको क्षति भएको तथा केही नागरिक अझै बेपत्ता रहेको अवस्थामा उद्धार टोलीले सम्भावित सबै स्थानमा खोजी अभियान सञ्चालन गरिरहेको छ । जलविद्युत् आयोजनाका सुरुङमा फसेकाको खोजीका लागि समेत विशेषज्ञ टोली परिचालन भएपछि उद्धारकार्यलाई थप प्राविधिक र व्यवस्थित बनाइएको छ ।
रसुवामा बाढी प्रभावित नागरिकको उद्धारसँगै सुरुङमा फसेकाको खोजी, बेपत्ताको खोजतलास र राहत वितरणलाई नेपाली सेनाले तीव्रता दिएको छ ।
