काठमाडौं । चीनको छोचेन खोला र पुरेपू त्साङ्पो नदीको संगम क्षेत्रमा पहिरोका कारण बनेको ठूलो ताल फुटेपछि आएको बाढी रसुवाको स्याफ्रुबेसीमा आइपुगेको छ। ताल फुटेपछि नदीमा पानीको बहाव एक्कासि बढ्दा रसुवाको भोटेकोशी नदीमा बाढी आएको हो।
बाढी पूर्वानुमान महाशाखाका अनुसार दिउँसो १२ बजेर ३१ मिनेटमा भोटेकोशी नदीको बाढी स्याफ्रुबेसीमा आइपुगेको हो। माथिल्लो क्षेत्रमा ताल फुटेपछि आएको पानीको बहाव नेपालतर्फ तीव्र रूपमा बढेको र त्यसको प्रभाव तल्लो तटीय क्षेत्रमा समेत पर्न सक्ने भन्दै महाशाखाले सतर्कता अपनाउन आग्रह गरेको छ।
भोटेकोशी नदीमा पानीको बहाव बढेसँगै त्रिशूली नदीको तटीय क्षेत्रमा समेत जोखिम बढेको महाशाखाले जनाएको छ। सम्भावित बाढी तथा डुबानको जोखिमलाई मध्यनजर गर्दै त्रिशूली नदी आसपासका बस्ती तथा तटीय क्षेत्रका नागरिकलाई विशेष सावधानी अपनाउन आग्रह गरिएको छ।
महाशाखाले त्रिशूली नदीको तटीय क्षेत्र मुग्लिनसम्मै अर्को सूचना जारी नभएसम्म उच्च सतर्कताका साथ सुरक्षित स्थानमा रहन अनुरोध गरेको छ। नदीको बहावमा थप वृद्धि हुन सक्ने सम्भावना रहेकाले नदी किनारमा नजान, जोखिमयुक्त क्षेत्रमा नबस्न तथा आवश्यक परे तत्काल सुरक्षित स्थानमा सर्न आग्रह गरिएको छ।
चीनको तिब्बत स्वायत्त क्षेत्रमा छोचेन खोला र पुरेपू त्साङ्पो नदीको संगम क्षेत्रमा पहिरोका कारण ठूलो ताल बनेको थियो। तालमा पानीको मात्रा निरन्तर बढ्दै गएपछि सम्भावित बाँध फुट्ने जोखिम देखिएको थियो। त्यसपछि चिनियाँ पक्षले तालको अवस्थालाई नजिकबाट निगरानी गर्दै आएको थियो।
ताल फुटेपछि ठूलो मात्रामा पानी नदीको बहावमा मिसिएको र त्यसको प्रभाव नेपालतर्फ देखिन थालेको हो। छोचेन र पुरेपू नदी प्रणाली नेपाल प्रवेश गरेपछि भोटेकोशी तथा त्रिशूली नदी प्रणालीसँग जोडिने भएकाले माथिल्लो क्षेत्रमा आएको बाढीको प्रभाव क्रमशः तल्लो क्षेत्रमा समेत पर्न सक्ने देखिएको छ।
यसअघि नै रसुवाको भोटेकोशी क्षेत्रमा बाढीले ठूलो क्षति पुर्याइसकेको अवस्थामा चीनतर्फको ताल फुटेपछि थप बाढीको जोखिम बढेको हो। नदी आसपासका क्षेत्रमा रहेका नागरिक तथा सुरक्षाकर्मीलाई समेत सतर्क रहन भनिएको छ।
विशेषगरी स्याफ्रुबेसीदेखि त्रिशूली नदीको तटीय क्षेत्र हुँदै मुग्लिनसम्मका बासिन्दाले नदीको बहाव र जलसतहमा हुने परिवर्तनलाई गम्भीरतापूर्वक लिनुपर्ने अवस्था रहेको छ। रातको समयमा समेत नदीको बहाव बढ्न सक्ने भएकाले नदी किनारमा नबस्न र सुरक्षित स्थानमा रहन आग्रह गरिएको छ।
महाशाखाले जारी गर्ने थप सूचना तथा स्थानीय प्रशासन र सुरक्षा निकायको निर्देशन पालना गर्न पनि नागरिकलाई आग्रह गरेको छ। बाढीको अवस्था निरन्तर निगरानीमा रहेकाले जोखिमयुक्त क्षेत्रमा रहेका नागरिकले पूर्वसावधानी अपनाएमा सम्भावित मानवीय क्षति कम गर्न सकिनेछ।
चीनमा बनेको ताल फुटेपछि आएको बाढी स्याफ्रुबेसीसम्म आइपुगेकाले अब त्रिशूली नदीको तटीय क्षेत्रमा समेत उच्च जोखिम देखिएको छ। मुग्लिनसम्मका नदी किनारका बासिन्दालाई अर्को सूचना जारी नभएसम्म उच्च सतर्कताका साथ सुरक्षित स्थानमा रहन आग्रह गरिएको छ।
