काठमाडौं । बाढी प्रभावित क्षेत्रमा थप उद्धार तथा राहत कार्यलाई तीव्रता दिन त्रिभुवन अन्तर्राष्ट्रिय विमानस्थलस्थित रेस्क्यु कोअर्डिनेसन सेन्टर (RCC) मार्फत २० वटा हेलिकोप्टर तयारी अवस्थामा राखिएको छ।
रेस्क्यु कोअर्डिनेसन सेन्टरका अनुसार आज बिहान ६ः३० बजेदेखि नै तत्काल परिचालन गर्न सकिने गरी २० वटा हेलिकोप्टर तयारी अवस्थामा राखिएका हुन्। बाढी प्रभावित क्षेत्र आसपास भने थप १० वटा हेलिकोप्टर परिचालन भएर उद्धार तथा राहत कार्यमा सक्रिय रहेका छन्।
बाढीका कारण विभिन्न स्थानमा नागरिक जोखिममा परेपछि उद्धारलाई प्राथमिकताका आधारमा सञ्चालन गर्न हेलिकोप्टरहरू तयारी अवस्थामा राखिएको हो। विशेषगरी सडक तथा स्थलमार्गबाट पुग्न कठिन भएका क्षेत्रमा हवाई उद्धारमार्फत जोखिममा रहेका नागरिकलाई सुरक्षित स्थानमा सार्ने योजना बनाइएको छ।
रेस्क्यु कोअर्डिनेसन सेन्टरले उद्धार आवश्यक पर्ने स्थानको पहिचान र प्राथमिकता निर्धारण विभिन्न माध्यमबाट प्राप्त सूचनाका आधारमा गर्ने जनाएको छ। प्रधानमन्त्री कार्यालयस्थित हटलाइन सेन्टर, गृह मन्त्रालय तथा अन्य माध्यमबाट प्राप्त उद्धारसम्बन्धी सूचनालाई संकलन गरी तत्काल उद्धार आवश्यक पर्ने क्षेत्रको प्राथमिकता तय गरिनेछ।
प्राप्त सूचनाका आधारमा कुन क्षेत्रमा तत्काल हेलिकोप्टर पठाउनुपर्ने हो भन्ने निर्णय गरिनेछ। जोखिममा रहेका नागरिकको संख्या, अवस्थाको गम्भीरता, स्थलमार्गको पहुँच तथा तत्काल उद्धारको आवश्यकतालाई ध्यानमा राखेर प्राथमिकता निर्धारण गरिने बताइएको छ।
त्यसपछि राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) को निर्देशनअनुसार तयारी अवस्थामा रहेका हेलिकोप्टरलाई सम्बन्धित क्षेत्रमा परिचालन गरिनेछ।
बाढी तथा पहिरोका कारण कतिपय स्थानमा सडक सम्पर्क विच्छेद भएकाले हवाई उद्धारलाई महत्वपूर्ण माध्यमका रूपमा अघि बढाइएको छ। प्रभावित क्षेत्रमा रहेका घाइते, वृद्धवृद्धा, बालबालिका तथा अन्य जोखिममा रहेका नागरिकलाई प्राथमिकताका आधारमा सुरक्षित स्थानमा सार्ने तयारी गरिएको छ।
उद्धारसँगै प्रभावित नागरिकका लागि आवश्यक राहत सामग्रीसमेत हवाई तथा स्थलमार्गबाट पुर्याउने व्यवस्था मिलाइनेछ। तत्काल खाद्यान्न, पानी, औषधि तथा अन्य अत्यावश्यक सामग्री आवश्यक पर्ने क्षेत्रको पहिचान गरी सोहीअनुसार राहत परिचालन गरिने जनाइएको छ।
रेस्क्यु कोअर्डिनेसन सेन्टरले आपत्कालीन उद्धार तथा राहत आवश्यक पर्ने स्थानबारे जानकारी भए सम्बन्धित व्यक्तिहरूलाई सेतु प्रणालीमार्फत रिपोर्ट गर्न आग्रह गरेको छ। प्राप्त सूचनालाई उद्धार व्यवस्थापनमा प्रयोग गरी आवश्यकताअनुसार सम्बन्धित निकायसँग समन्वय गरिनेछ।
बाढी प्रभावित क्षेत्रमा उद्धार तथा राहतको आवश्यकता बढिरहेका बेला ठूलो संख्यामा हेलिकोप्टर तयारी अवस्थामा राखिनुले तत्काल उद्धार गर्नुपर्ने अवस्था आएमा छिटो परिचालन गर्न सहज हुने अपेक्षा गरिएको छ।
सरकारी निकाय, सुरक्षा संयन्त्र तथा उद्धार टोलीबीच समन्वय गरी बाढी प्रभावित नागरिकको जीवनरक्षा तथा राहत वितरणलाई प्रभावकारी बनाउने प्रयास भइरहेको छ। जोखिममा रहेका नागरिक तथा प्रभावित क्षेत्रका स्थानीयलाई आधिकारिक सूचना तथा सम्बन्धित निकायसँग सम्पर्कमा रहन आग्रह गरिएको छ।
