काठमाडौं । राष्ट्रिय सभाको बैठक एक साताका लागि स्थगित भएको छ। मंगलबार बिहान बसेको बैठकले ‘नेपाल विशेष सेवा ऐन’ सम्बन्धी विधेयकलाई दफावार छलफलका लागि समितिमा पठाउने प्रस्ताव सर्वसम्मतिले स्वीकृत गरेपछि बैठक स्थगित गरिएको हो।
बैठकमा प्रधानमन्त्री बालेन्द्र शाहको तर्फबाट कानून, न्याय तथा संसदीय मामिलामन्त्री सोविता गौतमले ‘प्रतिनिधि सभाबाट सन्देशसहित प्राप्त नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक, २०८३’ लाई दफावार छलफलका लागि विधायन व्यवस्थापन समितिमा पठाउने प्रस्ताव प्रस्तुत गर्नुभएको थियो।
मन्त्री गौतमले प्रस्तुत गर्नुभएको प्रस्तावमाथि राष्ट्रिय सभामा छलफल भएपछि बैठकले उक्त प्रस्तावलाई सर्वसम्मतिले स्वीकृत गरेको हो।
प्रस्ताव स्वीकृत भएसँगै राष्ट्रिय सभा अध्यक्ष नारायण दाहालले अर्को बैठक भदौ १६ गते दिउँसो १ बजे बस्ने गरी निर्धारण गर्नुभएको छ।
समितिमा पठाइएको विधेयकमाथि अब विधायन व्यवस्थापन समितिले दफावार छलफल गर्नेछ। समितिको छलफल र अध्ययनपछि विधेयक पुनः राष्ट्रिय सभामा प्रस्तुत हुने प्रक्रिया अघि बढ्नेछ।
यससँगै मंगलबारको बैठकबाट विधेयकलाई समितिमा पठाउने महत्वपूर्ण प्रक्रिया पूरा भएको छ भने राष्ट्रिय सभाको अर्को बैठक भने एक सातापछि बस्ने भएको छ।
