काठमाडौं । काठमाडौँ उपत्यका ट्राफिक प्रहरी कार्यालय रामशाहपथले विभिन्न मिति र स्थानबाट चोरी भएका ५० थान दुईपाङ्ग्रे सवारीसाधन खोजतलास गरी सम्बन्धित धनीलाई हस्तान्तरण गरेको छ ।
कार्यालयले खोजतलास तथा अनुसन्धानका क्रममा फेला पारेका ३० थान मोटरसाइकल र २० थान स्कुटर सम्बन्धित धनीलाई हस्तान्तरण गरेको हो । बरामद गरिएका सवारीसाधन एक कार्यक्रमबीच धनीलाई हस्तान्तरण गरिएको काठमाडौँ उपत्यका ट्राफिक प्रहरी कार्यालयले जनाएको छ ।
कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले प्रहरीको सक्रिय खोजतलासका क्रममा फेला परेका सवारीसाधन सम्बन्धित धनीलाई हस्तान्तरण गरिएको जानकारी दिनुभयो ।
विभिन्न स्थानबाट दुईपाङ्ग्रे सवारीसाधन चोरी हुने क्रम बढिरहेको भन्दै प्रहरीले सवारीधनीलाई विशेष सावधानी अपनाउन आग्रह गरेको छ । सवारीसाधन पार्किङ गर्दा सुरक्षित तथा व्यवस्थित स्थान छनोट गर्न र सवारीसाधनलाई लक गरेर मात्र छाड्न प्रहरीले अनुरोध गरेको छ ।
त्यस्तै, सवारीसाधनसँग सम्बन्धित आवश्यक कागजात सुरक्षित राख्न तथा अपरिचित व्यक्तिलाई सवारीसाधनका कागजात वा अन्य संवेदनशील विवरण नदिनसमेत प्रहरीले सुझाव दिएको छ ।
प्रहरीका अनुसार सवारीसाधन चोरी भएको थाहा पाउनेबित्तिकै सम्बन्धित प्रहरी कार्यालयमा जानकारी गराउँदा खोजतलास तथा अनुसन्धानमा सहयोग पुग्नेछ । प्रहरीले उपत्यकामा हुने सवारीसाधन चोरी नियन्त्रणका लागि नियमित रूपमा खोजतलास तथा निगरानीलाई प्रभावकारी बनाउँदै आएको जनाएको छ ।
चोरी भएका सवारीसाधन बरामद गरी सम्बन्धित धनीलाई हस्तान्तरण गरिनुले सवारीसाधन चोरी नियन्त्रण तथा अनुसन्धानमा प्रहरीको सक्रियता देखिएको छ । प्रहरीले आगामी दिनमा समेत चोरी भएका सवारीसाधनको खोजतलासलाई निरन्तरता दिने जनाएको छ ।
