सल्यान । सल्यानमा यात्रुवाहक जिप भेरी नदीमा खस्दा दुई जना बेपत्ता भएका छन् भने दुई जना घाइते भएका छन्। छिन्चु–जाजरकोट सडकखण्डअन्तर्गत वनगाड कुपिण्डे नगरपालिका–१, बाङ्गिरह नजिकै बुधबार जिप दुर्घटना भएको हो।
प्रहरीका अनुसार लु १ ज ३०२२ नम्बरको जिप सडकबाट अनियन्त्रित भई भेरी नदीमा खसेको हो। बालुवा सङ्ग्रीबाट सल्लीबजारतर्फ फर्किने क्रममा जिप दुर्घटनामा परेको बताइएको छ। दुर्घटनाको कारण भने प्रारम्भिक रूपमा खुल्न सकेको छैन।
दुर्घटनामा वनगाड कुपिण्डे नगरपालिका–१, आँपखोलीका २९ वर्षीय प्रेम बिक र सोही स्थानका २१ वर्षीय खुमलाल बुढाथोकी घाइते भएका छन्। उनीहरूलाई उद्धार गरी उपचारका लागि स्थानीय अस्पतालमा लगिएको प्रहरीले जनाएको छ। दुवै घाइतेको अवस्था सामान्य रहेको बताइएको छ।
दुर्घटनापछि जिपमा सवार चालक र जिपधनी भेरी नदीमा बेपत्ता भएको प्रहरीले जनाएको छ। उनीहरूको पहिचान भने अझै खुलिनसकेको सल्यान प्रहरी प्रमुख प्रहरी नायब उपरीक्षक (डीएसपी) दीपक पातलीले जानकारी दिएका छन्।
बेपत्ता भएकाहरूको खोजी तथा उद्धारका लागि नेपाल प्रहरी, सशस्त्र प्रहरी तथा स्थानीयवासी परिचालन भएका छन्। नदीको बहाव र घटनास्थलको भौगोलिक अवस्थाका कारण खोजी कार्यमा कठिनाइ भइरहेको बताइएको छ।
घटनास्थलमा सुरक्षाकर्मी तथा स्थानीयवासीले नदी आसपासका क्षेत्रमा खोजी गरिरहेका छन्। जिप नदीमा गहिरो स्थानमा खसेको हुनसक्ने भएकाले बेपत्ताहरूको खोजीका लागि थप उद्धार प्रयास आवश्यक पर्ने प्रहरीले जनाएको छ।
घटनाबारे थप विवरण तथा बेपत्ता व्यक्तिको पहिचान खुल्न बाँकी रहेको प्रहरीले जनाएको छ। दुर्घटनाको कारणबारे समेत अनुसन्धान भइरहेको छ।
