काठमाडौं । संघीय संसद् अन्तर्गत प्रतिनिधिसभाको बैठक मंगलबार पनि बस्दैछ । संसद् सचिवालयका अनुसार बैठक दिउँसो १ बजे सिंहदरबारस्थित संघीय संसद् भवनमा बस्नेछ ।
मंगलबारको बैठकमा ‘खानी तथा खनिज पदार्थ विधेयक, २०८३’ माथि विचार गरियोस् भन्ने प्रस्ताव प्रस्तुत हुने सम्भावित कार्यसूची रहेको संसद् सचिवालयले जनाएको छ ।
उक्त प्रस्ताव उद्योग, वाणिज्य तथा आपूर्तिमन्त्री गौरी कुमारीले प्रतिनिधिसभामा प्रस्तुत गर्ने सम्भावित कार्यसूचीमा उल्लेख छ ।
खानी तथा खनिज पदार्थसम्बन्धी विद्यमान कानुनी व्यवस्थालाई समयानुकूल बनाउने तथा खानीजन्य स्रोतको व्यवस्थापन, उत्खनन र उपयोगलाई व्यवस्थित गर्ने उद्देश्यसहित विधेयक अघि बढाइएको हो ।
प्रतिनिधिसभा बैठकमा विधेयकमाथि विचार गरियोस् भन्ने प्रस्ताव प्रस्तुत भएपछि सांसदहरूले त्यसको सैद्धान्तिक पक्षमा छलफल गर्नेछन् । छलफलपछि विधेयकलाई थप प्रक्रियाका लागि अघि बढाउने बाटो खुल्नेछ ।
संसद् सचिवालयले सार्वजनिक गरेको सम्भावित कार्यसूचीअनुसार मंगलबारको बैठकमा खानी तथा खनिज पदार्थसम्बन्धी विधेयक प्रमुख कार्यसूचीका रूपमा रहनेछ ।
प्रतिनिधिसभाको बैठक नियमित रूपमा सञ्चालन भइरहेकाले बैठकमा समसामयिक विषय तथा अन्य संसदीय कार्यसमेत अघि बढ्न सक्ने बताइएको छ ।
