एजेन्सी । बंगलादेशको निर्वाचन आयोगले आगामी अगस्ट २० मा राष्ट्रपतीय निर्वाचन हुने घोषणा गरेको छ। आयोगले बिहीबार राजधानी ढाकामा पत्रकार सम्मेलन गर्दै निर्वाचन कार्यतालिका सार्वजनिक गरेको हो।
निर्वाचन आयोगका वरिष्ठ सचिव अख्तर अहमदले राष्ट्रपतिको निर्वाचनका लागि उम्मेदवारहरूले अगस्ट १३ भित्र नामांकन पत्र दर्ता गरिसक्नुपर्ने जानकारी दिनुभयो। उहाँका अनुसार निर्वाचनको सम्पूर्ण तयारी तीव्र गतिमा अघि बढाइएको छ।
आयोगले राष्ट्रपतीय निर्वाचनका लागि संसद् सचिवालयबाट ३५० जना सांसद समावेश रहेको मतदाता नामावली प्राप्त गरिसकेको जनाएको छ। बंगलादेशको संवैधानिक व्यवस्थाअनुसार राष्ट्रपतिको निर्वाचनमा सर्वसाधारणले मतदान गर्ने व्यवस्था छैन। संसद्का निर्वाचित सदस्यहरू नै राष्ट्रपतिको निर्वाचनका मतदाता हुन्छन्।
यसअघि बंगलादेशका राष्ट्रपति मोहम्मद शाहाबुद्दीन चुप्पुले जुलाई २४ मा गम्भीर स्वास्थ्य समस्याको कारण देखाउँदै संसद्का सभामुख हाफिज उद्दीन अहमदलाई सम्बोधन गरिएको पत्रमार्फत पदबाट राजीनामा दिनुभएको थियो।
राष्ट्रपतिको राजीनामापछि बंगलादेशको संसद् सचिवालयले संविधानबमोजिम सभामुख हाफिज उद्दीन अहमदले कार्यवाहक राष्ट्रपतिको जिम्मेवारी सम्हाल्न सुरु गरेको जनाएको थियो। त्यसपछि रिक्त रहेको राष्ट्रपतिको पद पूर्ति गर्न निर्वाचन आयोगले निर्वाचन मिति घोषणा गरेको हो।
संविधानअनुसार निर्वाचित सांसदहरूले मतदानमार्फत नयाँ राष्ट्रपतिको चयन गर्ने व्यवस्था रहेको छ। आगामी निर्वाचनपछि निर्वाचित राष्ट्रपतिले संविधानबमोजिम पद तथा गोपनीयताको शपथ ग्रहण गरी कार्यभार सम्हाल्नेछन्।
