काठमाडाैं । पाल्पामा आगलागीमा परी गम्भीर घाइते भएकी ८ वर्षीया साजुदा बानुको उपचारकाे क्रममा निधन भएको छ ।
तानसेन नगरपालिका–४ स्थित मिलेनियम सेकेण्डरी स्कुलको चमेना गृहमा ग्यासको पाइप फुस्किएर भएको आगलागीमा परी बालिका घाइते भएकाे प्रहरीले बताएकाे हाे । काठमाडौंस्थित कीर्तिपुर बर्न अस्पतालमा बुधबार उनको निधन भएको हो ।एलकेजीमा अध्ययनरत बानु यहि साउन ७ गते खाजा खाने क्रममा भएको आगलागीमा करिब ३५ प्रतिशत शरीर जलेर गम्भीर घाइते भएकी थिइन् ।
तानसेनस्थित युनाइटेड मिसन अस्पतालमा प्राथमिक उपचारपछि उनलाई हेलिकोप्टरमार्फत काठमाडौं ल्याइएकाे थियो । मंगलबारदेखि भेन्टिलेटरमा राखेर उपचार गरिए पनि उनको ज्यान बचाउन नसकिएको पारिवारिक स्रोतले जनाएको छ ।
आगलागीमा घाइते भएका अन्य दुई विद्यार्थीको अवस्था भने सामान्य रहेकाे प्रहरीले बताएकाे हाे ।
