काठमाडौं । बैङ्किङ कसुर मुद्दामा फरार रहेका एक प्रतिवादीलाई त्रिभुवन अन्तर्राष्ट्रिय विमानस्थलबाट पक्राउ गरिएको छ। सिमराबाट काठमाडौँ आउने क्रममा उनलाई विमानस्थलको आन्तरिक आगमन कक्षबाट नियन्त्रणमा लिइएको हो।
त्रिभुवन अन्तर्राष्ट्रिय विमानस्थल सुरक्षा कार्यालयका अनुसार पक्राउ पर्नेमा सिन्धुपाल्चोक जिल्ला इन्द्रावती गाउँपालिका–१ सिम्पालकाभ्रे निवासी ४० वर्षीय रामबहादुर थापा रहेका छन्। उनी इलाका प्रहरी कार्यालय नवलपुरमा दर्ता रहेको बैङ्किङ कसुर मुद्दामा फरार प्रतिवादी थिए।
प्रहरीले विशेष सूचनाका आधारमा सिमराबाट काठमाडौँ आइपुगेका थापालाई विमानस्थलको आन्तरिक आगमन कक्षबाट पक्राउ गरेको जनाएको छ। पक्राउपछि आवश्यक कानुनी प्रक्रिया पूरा गरी उनलाई थप अनुसन्धान तथा कारबाहीका लागि इलाका प्रहरी कार्यालय नवलपुर, सिन्धुपाल्चोक पठाउने तयारी भइरहेको छ।
त्रिभुवन अन्तर्राष्ट्रिय विमानस्थल सुरक्षा कार्यालयका प्रवक्ता प्रहरी उपरीक्षक राजकुमार सिलवालका अनुसार फरार प्रतिवादीलाई नियन्त्रणमा लिएर सम्बन्धित प्रहरी कार्यालयमा बुझाउने प्रक्रिया अघि बढाइएको छ।
प्रहरीले फरार अभियुक्त तथा प्रतिवादीको खोजी अभियानलाई निरन्तर तीव्र बनाएको जनाएको छ। विभिन्न आपराधिक तथा आर्थिक कसुरका मुद्दामा फरार व्यक्तिहरूलाई पक्राउ गरी कानुनी दायरामा ल्याउने अभियान देशभर सञ्चालन भइरहेको प्रहरीले जनाएको छ।
