काठमाडौं । चितवनको सिमलताल नजिक आज बिहान खसेको पहिरो पन्छाइएपछि नारायणगढ–मुग्लिन सडकखण्डमा यातायात सेवा पुनः पूर्ववत् सञ्चालनमा आएको छ।
आज बिहान ७ः०५ बजे सिमलताल क्षेत्रमा पहिरो खस्दा सडक पूर्ण रूपमा अवरुद्ध भएको थियो। पहिरोका कारण दुवैतर्फ सवारी साधन रोकिँदा सयौं यात्रु केही समय सडकमै रोकिएका थिए।
डिभिजन सडक कार्यालयले तत्काल डोजर तथा अन्य हेभी उपकरण परिचालन गरी पहिरो हटाउने कार्य सुरु गरेको थियो। केही घण्टाको प्रयासपछि पहिरो पूर्ण रूपमा पन्छाइएपछि अहिले सडकमा दुवैतर्फबाट सवारी आवागमन सुचारु भएको छ।
डिभिजन सडक कार्यालयका सूचना अधिकारी कृष्ण आचार्यका अनुसार पहिरो हटाउने काम सम्पन्न भएसँगै नारायणगढ–मुग्लिन सडकखण्डमा यातायात सेवा पूर्ववत् सञ्चालनमा आएको हो।
वर्षायामका कारण यस सडकखण्डका सिमलताल, जलवीरे, केराबारी लगायतका क्षेत्रमा बारम्बार पहिरो खस्ने जोखिम रहने भएकाले सडक विभागले चालकलाई सावधानीपूर्वक यात्रा गर्न आग्रह गरेको छ।
साथै, लगातार वर्षा भइरहेकाले थप पहिरो खस्ने सम्भावना कायमै रहेको भन्दै यात्रु तथा सवारी चालकलाई यात्रा अघि सडकको पछिल्लो अवस्थाबारे जानकारी लिएर मात्र यात्रा गर्न सम्बन्धित निकायले अनुरोध गरेको छ।
