काठमाडौं । लगातारको अविरल वर्षासँगै देशका विभिन्न स्थानमा पहिरो, सडक कटान तथा हिलोका कारण प्रमुख राजमार्गहरू प्रभावित भएका छन्। नेपाल प्रहरीले शुक्रबार बिहान ६ बजेसम्मको अद्यावधिक विवरण सार्वजनिक गर्दै देशभरका नौ प्रमुख सडक तथा राजमार्ग पूर्ण रूपमा अवरुद्ध भएको जनाएको छ।
वर्षासँगै पहाडी भूभागमा पहिरो खस्ने क्रम बढेपछि यात्रु तथा सवारीसाधनको सुरक्षालाई ध्यानमा राख्दै केही राजमार्गमा रातिको समयमा सवारी सञ्चालनमा समेत रोक लगाइएको छ। प्रहरीले अत्यावश्यक बाहेकका यात्रामा सावधानी अपनाउन र यात्रा अघि सम्बन्धित निकायबाट सडक अवस्थाबारे जानकारी लिन आग्रह गरेको छ।
बिपी राजमार्गमा राति सवारी सञ्चालन रोक
काभ्रेपलाञ्चोक र सिन्धुली जोड्ने बिपी राजमार्ग अन्तर्गत खुर्कोट–नेपालथोक–कटुन्जेबेँसी सडक खण्डमा सम्भावित बाढी र पहिरोको जोखिम बढेपछि बेलुका ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ।
यो निर्णय यात्रुको सुरक्षालाई मध्यनजर गर्दै गरिएको प्रहरीले जनाएको छ। मौसममा सुधार नआएसम्म आवश्यकताअनुसार यस्तो व्यवस्था कायम रहने जनाइएको छ।
कान्ति लोकपथमा पनि वर्षायामभर रातिको यात्रा निषेध
यस्तै, कान्ति लोकपथ मा पनि वर्षायामभर बेलुका ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा रोक लगाइएको छ। वर्षाको समयमा सडक जोखिमपूर्ण हुने भएकाले दुर्घटना न्यूनीकरणका लागि यो निर्णय गरिएको हो।
यी सडक पूर्ण रूपमा अवरुद्ध
नेपाल प्रहरीका अनुसार निम्न सडक तथा राजमार्गहरू पहिरो, हिलो तथा सडक कटानका कारण पूर्ण रूपमा अवरुद्ध भएका छन्–
इलाम नगरपालिका–९ राजदुवालीस्थित मेची राजमार्ग – सडक हिलाम्मे भएपछि पूर्ण अवरुद्ध।
सिन्धुपाल्चोकको भोटेकोशी गाउँपालिका अन्तर्गत जिरोकिलो र कोदारी क्षेत्रमा पर्ने अरनिको राजमार्ग – पहिरोका कारण पूर्ण रूपमा बन्द।
बागलुङको जैमिनी नगरपालिका–८ बेलबगरस्थित कालीगण्डकी करिडोर – पहिरोले यातायात ठप्प।
रोल्पाको परिवर्तन गाउँपालिकास्थित घोराही–थवाङ शहीद राजमार्ग – सडक अवरुद्ध।
मुगुको छायाँनाथ रारा नगरपालिका–७ पिना खोलास्थित नाग्म–गमगडी सडक – पहिरोले आवागमन बन्द।
रसुवाको गोसाईंकुण्ड गाउँपालिकास्थित पासाङ ल्हामु राजमार्ग – पहिरोका कारण पूर्ण अवरुद्ध।
अछामको पञ्चदेवल विनायक नगरपालिका–४ पानीखोलास्थित मध्यपहाडी लोकमार्ग – सडक अवरुद्ध।
लमजुङको मर्स्याङ्दी गाउँपालिका–४ म्याग्दे भीरस्थित बेँसीसहर–चामे–मनाङ सडक – पहिरोका कारण यातायात ठप्प।
दोलखामा वैकल्पिक मार्ग सञ्चालन
यता, दोलखाको तामाकोशी गाउँपालिका–५ किर्नेटारस्थित लामासाँघु–रामेछाप सडक खण्ड तामाकोशी नदीको कटानका कारण अवरुद्ध भए पनि यात्रुलाई सहज बनाउन खिम्ती ग्रामीण विद्युत् सहकारी संस्थाको कार्यालय परिसर हुँदै वैकल्पिक मार्ग सञ्चालन गरिएको नेपाल प्रहरीले जनाएको छ।
सतर्क रहन प्रहरीको आग्रह
नेपाल प्रहरीले देशभर वर्षा जारी रहेकाले पहिरो, बाढी र सडक कटानको जोखिम अझै कायम रहेको जनाएको छ। विशेष गरी पहाडी तथा हिमाली जिल्लातर्फ यात्रा गर्ने सवारी चालक र यात्रुले सडक अवस्थाबारे जानकारी लिएर मात्र यात्रा गर्न तथा जोखिमपूर्ण क्षेत्रमा अनावश्यक यात्रा नगर्न आग्रह गरिएको छ।
प्रहरीले सडक खुलाउने कार्य सम्बन्धित निकायसँगको समन्वयमा निरन्तर जारी रहेको जनाएको छ। मौसममा सुधार नआएसम्म थप सडकहरू पनि प्रभावित हुन सक्ने भएकाले नागरिकलाई सतर्कता अपनाउन अनुरोध गरिएको छ।
