काठमाडौं । महाकाली नदीमा पानीको बहाव निरन्तर बढ्दै सतर्कता तह पार गरेपछि कञ्चनपुरस्थित शारदा ब्यारेजमा चारपाङ्ग्रे सवारीसाधनको आवतजावतमा अस्थायी रूपमा रोक लगाइएको छ। नदीमा पानीको सतह बढ्दै गएपछि सम्भावित जोखिमलाई मध्यनजर गर्दै जिल्ला प्रशासन र सुरक्षा निकायले यो निर्णय गरेका हुन्।
जिल्ला प्रहरी कार्यालय कञ्चनपुरका प्रहरी नायब उपरीक्षक टेकबहादुर रावतका अनुसार आज बिहान महाकाली नदीको बहाव एक लाख क्युसेक नाघेपछि शारदा ब्यारेजमा चारपाङ्ग्रे सवारी सञ्चालन रोकिएको हो। दिउँसो १:३० बजेको पछिल्लो मापनअनुसार नदीको बहाव १ लाख २४ हजार ४५४ क्युसेक पुगेको छ, जुन बिहानको तुलनामा अझ बढी रहेको प्रहरीले जनाएको छ।
डीएसपी रावतले नदीको जलस्तर लगातार बढिरहेकाले यात्रु र सवारीसाधनको सुरक्षालाई प्राथमिकतामा राख्दै चारपाङ्ग्रे सवारीलाई ब्यारेज पार गर्न नदिइएको बताए। आवश्यकताअनुसार अवस्था सामान्य भएपछि मात्रै पुनः सञ्चालनबारे निर्णय गरिने उनले जानकारी दिए।
पछिल्ला केही दिनदेखि सुदूरपश्चिम प्रदेशका पहाडी जिल्लाहरूमा निरन्तर वर्षा भइरहेकाले महाकाली नदीमा पानीको बहाव उल्लेख्य रूपमा बढेको हो। मौसम पूर्वानुमानअनुसार अझै केही दिन वर्षा जारी रहने सम्भावना रहेकाले नदीको जलस्तर थप बढ्न सक्ने अनुमान गरिएको छ।
स्थानीय प्रशासनले महाकाली नदी आसपासका तटीय क्षेत्रका बासिन्दालाई विशेष सावधानी अपनाउन आग्रह गरेको छ। नदी किनार, कटानको जोखिम भएका स्थान तथा होचा भूभागमा बसोबास गर्ने नागरिकलाई आवश्यक परे सुरक्षित स्थानतर्फ जान तयारी अवस्थामा रहन अनुरोध गरिएको छ।
यसैबीच, जल तथा मौसम विज्ञान विभागले सुदूरपश्चिम प्रदेशका अधिकांश जिल्लामा आगामी केही दिन मध्यमदेखि भारी वर्षाको सम्भावना रहेको जनाएको छ। विभागले विशेषगरी साना नदी, खोला तथा नालामा आकस्मिक बाढी आउन सक्ने भएकाले नदी आसपासका बासिन्दा, यात्रु तथा सवारी चालकलाई उच्च सतर्कता अपनाउन आग्रह गरेको छ।
मनसुन सक्रिय रहेकाले देशका विभिन्न नदी तथा खोलामा जलस्तर बढ्ने क्रम जारी रहेको भन्दै सम्बन्धित निकायले मौसमको नियमित जानकारी लिन, अनावश्यक यात्रा नगर्न तथा स्थानीय प्रशासन र सुरक्षा निकायले जारी गर्ने सूचनाको पालना गर्न सबैमा अनुरोध गरेका छन्।
प्रशासनले मौसममा सुधार नआएसम्म जोखिमयुक्त क्षेत्रहरूमा अनावश्यक आवतजावत नगर्न र कुनै पनि आपत्कालीन अवस्था देखिएमा तत्काल प्रहरी तथा स्थानीय निकायलाई जानकारी गराउन पनि आग्रह गरेको छ।
