ललितपुर । बर्डफ्लु (एभियन इन्फ्लुएञ्जा) संक्रमणका कारण झण्डै डेढ महिनादेखि बन्द रहेको ललितपुरको जावलाखेलस्थित सदर चिडियाखाना आजदेखि पुनः सर्वसाधारणका लागि खुला गरिएको छ। आवश्यक स्वास्थ्य परीक्षण, सरसफाइ तथा संक्रमण नियन्त्रणका सबै प्रक्रिया पूरा भएपछि चिडियाखाना सञ्चालनमा ल्याइएको हो।
चिडियाखाना गत असार ५ गतेदेखि बन्द गरिएको थियो। काग, गिद्ध, हाँसलगायत केही पक्षीमा बर्डफ्लु संक्रमण पुष्टि भएपछि आगन्तुकको स्वास्थ्य सुरक्षा र संक्रमण फैलिन नदिन चिडियाखाना अस्थायी रूपमा बन्द गरिएको थियो। त्यसपछि संक्रमित पक्षीहरूको उपचार, प्रभावित क्षेत्रको सरसफाइ, जैविक सुरक्षा व्यवस्थापन तथा आवश्यक निगरानीका कामहरू तीव्र रूपमा सञ्चालन गरिएको थियो।
चिडियाखाना प्रशासनका अनुसार वातावरणीय नमुनाको परीक्षण गर्दा एभियन इन्फ्लुएञ्जा (बर्डफ्लु) भाइरस नदेखिएको पुष्टि भएपछि पुनः सञ्चालन गर्ने निर्णय गरिएको हो। परीक्षण प्रतिवेदनले संक्रमण नियन्त्रणमा आएको देखाएपछि सम्बन्धित निकायले आगन्तुकका लागि चिडियाखाना खोल्न अनुमति दिएको जनाएको छ।
बिहीबार पशु सेवा विभाग, केन्द्रीय पशु रोग अनुसन्धान प्रयोगशाला तथा इपिडिमियोलोजी तथा रोग नियन्त्रण महाशाखाका वरिष्ठ अधिकारीहरूको संयुक्त बैठकले सबै स्वास्थ्य मापदण्ड पूरा भएको निष्कर्ष निकाल्दै चिडियाखाना पुनः सञ्चालन गर्ने निर्णय गरेको थियो।
चिडियाखानाका प्रवक्ता तथा सूचना अधिकारी गणेश कोइरालाका अनुसार चिडियाखाना प्रत्येक दिन बिहान १०:०० बजेदेखि बेलुका ४:०० बजेसम्म प्रवेशका लागि खुला रहनेछ। आगन्तुकले भने बेलुका ५:०० बजाभित्र चिडियाखाना परिसरबाट बाहिरिनुपर्ने व्यवस्था गरिएको छ।
प्रशासनले आगन्तुकलाई जनावर तथा पक्षीहरूको अवलोकन गर्दा सुरक्षित दूरी कायम गर्न विशेष अनुरोध गरेको छ। यसअघि संक्रमण देखिएका केही खोरहरूलाई अझै रातो रिबनले घेरिएको अवस्थामा राखिएको जनाउँदै ती क्षेत्रमा अनावश्यक रूपमा नबस्न तथा दूरी कायम गर्न आग्रह गरिएको छ।
त्यसैगरी, चिडियाखाना परिसरमा आफूसँग ल्याएका खानेकुरा खुला स्थानमा नखान, प्रयोगपछि फोहर अनिवार्य रूपमा डस्टबिनमा फाल्न तथा सरसफाइका नियम पालना गर्न आग्रह गरिएको छ। संक्रमणको जोखिम पूर्ण रूपमा समाप्त नभएसम्म अनिवार्य रूपमा मास्क प्रयोग गर्न पनि प्रशासनले सर्वसाधारणलाई अनुरोध गरेको छ।
चिडियाखाना व्यवस्थापनले जैविक सुरक्षा (बायोसेक्युरिटी) सम्बन्धी मापदण्डलाई अझ प्रभावकारी बनाइएको जनाएको छ। जनावर तथा पक्षीहरूको नियमित स्वास्थ्य परीक्षण, खोरहरूको दैनिक सरसफाइ, कर्मचारीको स्वास्थ्य निगरानी तथा संक्रमण रोकथामका उपायलाई निरन्तरता दिइने बताइएको छ।
नेपालकै प्रमुख पर्यटकीय तथा शैक्षिक गन्तव्यका रूपमा रहेको जावलाखेल सदर चिडियाखानामा दैनिक सयौँ आन्तरिक तथा बाह्य पर्यटक, विद्यार्थी तथा अनुसन्धानकर्ताको आगमन हुने गर्दछ। पुनः सञ्चालनसँगै चिडियाखानामा आगन्तुकको चहलपहल बढ्ने अपेक्षा गरिएको छ।
चिडियाखाना प्रशासनले सबै आगन्तुकलाई स्वास्थ्य सुरक्षा मापदण्डको पूर्ण पालना गर्दै जिम्मेवार ढंगले अवलोकन गर्न आग्रह गरेको छ, ताकि भविष्यमा यस्ता संक्रमणजन्य जोखिमबाट जनावर, पक्षी र मानिस सबैलाई सुरक्षित राख्न सकियोस्।
