काठमाडौँ । कर्तव्य ज्यान मुद्दामा २० वर्ष कैद सजाय सुनाइएपछि कारागारबाट फरार भएका एक दोषीलाई नेपाल प्रहरीले करिब दुई दशकपछि पक्राउ गरेको छ। पक्राउ परेका व्यक्तिलाई आवश्यक कानुनी प्रक्रिया पूरा गरी जिल्ला अदालतमा उपस्थित गराउने तयारी गरिएको प्रहरीले जनाएको छ।
नेपाल प्रहरीका केन्द्रीय प्रवक्ता एवं प्रहरी नायब महानिरीक्षक अविनारायण काफ्लेका अनुसार पक्राउ पर्नेमा कैलालीको टीकापुर नगरपालिका–१ वनगाउँ निवासी अन्दाजी ४५ वर्षीय धनबहादुर घर्तीमगर रहेका छन्। उनी लामो समयदेखि फरार सूचीमा रहेका थिए।
प्रहरीका अनुसार घर्तीमगरलाई कैलाली जिल्ला अदालतले विसं २०५६ चैत १३ गते कर्तव्य ज्यान मुद्दामा दोषी ठहर गर्दै २० वर्ष कैद सजाय सुनाएको थियो। अदालतको फैसलापछि उनी कारागारमा कैद भुक्तान गरिरहेका थिए।
तर, कैद भुक्तानकै क्रममा विसं २०६१ माघ २७ गते उनी कैलाली कारागारबाट फरार भएका थिए। त्यसयता उनी फरार रहँदै आएका थिए भने नेपाल प्रहरीले उनको खोजी कार्यलाई निरन्तरता दिएको थियो।
लामो समयको अनुसन्धान, निगरानी तथा सूचनाको आधारमा प्रहरीले अन्ततः घर्तीमगरलाई पक्राउ गर्न सफल भएको जनाएको छ। पक्राउपछि उनलाई कानुनबमोजिम आवश्यक प्रक्रिया पूरा गरी आजै कैलाली जिल्ला अदालतसमक्ष उपस्थित गराइने तयारी भइरहेको प्रहरीले जानकारी दिएको छ।
नेपाल प्रहरीले फरार रहेका विभिन्न अभियुक्तहरूको खोजी तथा पक्राउ अभियानलाई तीव्र बनाएको बताउँदै अदालतबाट सजाय तोकिएर फरार भएका व्यक्तिहरूलाई कानुनी दायरामा ल्याउने कार्य निरन्तर जारी रहने जनाएको छ। प्रहरीले अदालतको फैसला कार्यान्वयनलाई प्रभावकारी बनाउन देशभर विशेष अभियान सञ्चालन गरिरहेको समेत उल्लेख गरेको छ।
