काठमाडौँ । धितोपत्र बजारमा शेयर कारोबार मापन गर्ने प्रमुख सूचक नेपाल स्टक एक्सचेञ्ज (नेप्से) परिसूचक आज पनि ओरालो लागेको छ । पछिल्ला दिनमा देखिएको उतारचढावबीच आज बजार परिसूचक घटेर बन्द भएको हो ।
नेपाल स्टक एक्सचेञ्जका अनुसार आज नेप्से परिसूचक ८ दशमलव ५० अङ्कले घटेर २ हजार ६५१ दशमलव ५२ विन्दुमा सीमित भएको छ । अघिल्लो कारोबार दिनको तुलनामा बजारमा सामान्य दबाब देखिएको हो ।
त्यस्तै, ठूला तथा बलिया कम्पनीको शेयर कारोबार मापन गर्ने सेन्सेटिभ परिसूचक पनि ० दशमलव ६४ अङ्कले घटेर ४५८ दशमलव २३ विन्दुमा झरेको छ ।
आजको कारोबारमा कुल ३३८ कम्पनीका ६४ लाख ८० हजार ५९९ कित्ता शेयर किनबेच भएका छन् । नेप्सेका अनुसार आज कुल कारोबार रकम २ अर्ब ८३ करोड ८२ लाख ७९ हजार ४११ रुपैयाँ पुगेको छ ।
कारोबार रकमका आधारमा आज सोपान फर्मासिटिकल्स शीर्ष स्थानमा रहेको छ । त्यसपछि रिलायन्स स्पिनिङ मिल्स, सप्तकोशी डेभलपमेन्ट बैंक, आँखुखोला जलविद्युत् कम्पनी र नेपाल एसबिआई बैंक धेरै कारोबार हुने शीर्ष पाँच कम्पनीमा परेका छन् ।
आजको बजारमा केही कम्पनीका लगानीकर्ताले भने राम्रो प्रतिफल पाएका छन् । नेप्सेका अनुसार टक्सार पिलुवा खोला हाइड्रोपावर, याम्बालिङ हाइड्रोपावर, कालिका लघुवित्त, सप्तकोशी डेभलपमेन्ट बैंक र रिलायन्स स्पिनिङ मिल्सका लगानीकर्ताले आज कमाएका छन् ।
त्यसैगरी, केही कम्पनीका लगानीकर्ता भने घाटामा परेका छन् । भुजुङ हाइड्रोपावर, सिवाइसी नेपाल लघुवित्त, भगवती हाइड्रोपावर, सानिमा डिबेञ्चर र थ्री स्टार हाइड्रोपावरका लगानीकर्ताले आज गुमाएका छन् ।
विश्लेषकहरूका अनुसार पछिल्लो समय लगानीकर्ताको मनोविज्ञान, नाफा बुक गर्ने प्रवृत्ति तथा ठूला कम्पनीको शेयरमा देखिएको बिक्री चापका कारण बजारमा उतारचढाव देखिएको छ । कारोबार रकम भने अर्बौंमा कायम रहेकाले बजारप्रति लगानीकर्ताको चासो अझै रहेको देखिन्छ ।
