चितवन । राष्ट्रिय स्वतन्त्र पार्टी (रास्वपा)को प्रथम महाधिवेशनअन्तर्गत दोस्रो चरणको निर्वाचन कार्यतालिका सार्वजनिक भएको छ ।
पार्टी केन्द्रीय निर्वाचन आयोगका अनुसार पदाधिकारी पदका लागि उम्मेदवारी फारम वितरण तथा दर्ताको समय आज साँझ ६ः३० बजेदेखि ७ः०० बजेसम्म तोकिएको छ ।
केन्द्रीय निर्वाचन आयोगका प्रमुख भुवन केसीले पदाधिकारी पदमा उम्मेदवारी दिनेहरूको प्रारम्भिक नामावली साँझ ७ः३० बजे प्रकाशित गरिने जानकारी दिएका छन् ।
निर्वाचन तालिकाअनुसार प्रारम्भिक नामावली प्रकाशनपछि साँझ ७ः३० बजेदेखि ८ः०० बजेसम्म उम्मेदवारविरुद्ध दाबी विरोध गर्न सकिनेछ । त्यसपछि ८ः१५ बजेसम्म परेको दाबी विरोधमाथि जाँचबुझ गरिने र उम्मेदवारले नाम फिर्ता लिने समय ८ः३० बजेसम्म तोकिएको छ ।
त्यसैगरी पदाधिकारी पदका उम्मेदवारको अन्तिम नामावली ८ः४५ बजे सार्वजनिक गरिनेछ । त्यसपछि ८ः४५ बजेदेखि ९ः१५ बजेसम्म मौन अवधि रहनेछ ।
निर्वाचन आयोगले सार्वजनिक गरेको तालिकाअनुसार मतदान प्रक्रिया राति ९ः१५ बजेदेखि १२ः१५ बजेसम्म सञ्चालन हुनेछ । मतदान सकिएपछि राति १२ः१५ बजेदेखि १ः१५ बजेसम्म मतगणना गरिने र अन्तिम मतपरिणाम राति १ः३० बजे घोषणा गर्ने तयारी गरिएको छ ।
रास्वपाको प्रथम महाधिवेशन गत आइतबारदेखि सुरु भएको हो । महाधिवेशनको बन्दसत्र चितवनस्थित उद्योग सङ्घको प्रदर्शनी केन्द्रमा सञ्चालन भइरहेको छ । पदाधिकारी चयनका लागि हुने निर्वाचनलाई पार्टीको आगामी नेतृत्व निर्धारण गर्ने महत्वपूर्ण चरणका रूपमा हेरिएको छ ।
