काठमाडौं । ज्येष्ठ शुक्ल एकादशी अर्थात निर्जला एकादशीको अवसरमा बिहीबार देशभरका वैदिक सत्य सनातन हिन्दु धर्मावलम्बीहरूले आ–आफ्नो घरमा तुलसीको बीउ (दल) राखेका छन् ।
हिन्दु धार्मिक परम्पराअनुसार निर्जला एकादशीका दिन तुलसीको बीउ रोप्ने प्रचलन रहेको छ । यस दिन राखिएको बीउबाट उम्रिएका तुलसीका बिरुवालाई करिब एक महिनापछि पर्ने आषाढ शुक्ल एकादशी अर्थात हरिशयनी एकादशीका दिन विधिपूर्वक घरको तुलसी मठमा सार्ने गरिन्छ ।
धार्मिक मान्यताअनुसार तुलसीलाई भगवान विष्णुको प्रिय वनस्पतिका रूपमा लिइन्छ । त्यसैले निर्जला एकादशीका दिन तुलसी रोप्ने, पूजा गर्ने र भगवान विष्णुको आराधना गर्ने परम्परा रहिआएको छ ।
हिन्दु संस्कृतिमा तुलसीलाई केवल धार्मिक दृष्टिले मात्र नभई औषधीय गुण भएको महत्वपूर्ण वनस्पतिका रूपमा पनि सम्मान गरिन्छ । घरको आँगनमा तुलसी राख्दा सकारात्मक ऊर्जा आउने, वातावरण शुद्ध हुने र स्वास्थ्यका लागि समेत लाभदायक हुने धार्मिक तथा सांस्कृतिक विश्वास छ ।
निर्जला एकादशीमा भक्तजनहरूले निराहार वा फलाहार व्रत बस्ने, पूजा–आराधना गर्ने तथा भगवान विष्णुको स्मरण गर्ने गर्दछन् । वर्षभरिका एकादशीमध्ये निर्जला एकादशीलाई विशेष महत्त्वपूर्ण मानिने भएकाले देशभरका हिन्दु समुदायले श्रद्धा र भक्तिपूर्वक यो पर्व मनाएका छन् ।
