काठमाडौं । नेपाली बजारमा आज सुनको मूल्यमा उल्लेख्य गिरावट आएको छ । बुधबारको तुलनामा आज सुनको मूल्य प्रतितोला ५ हजार २०० रुपैयाँले घटेको हो ।
नेपाल सुनचाँदी व्यवसायी महासंघका अनुसार आज छापावाल सुन प्रतितोला २ लाख ७८ हजार ३०० रुपैयाँमा कारोबार भइरहेको छ । पछिल्लो समय लगातार उच्च बिन्दुमा पुगेको सुनको मूल्यमा एकैदिन ठूलो गिरावट आएपछि बजारमा चासो बढेको छ ।
त्यस्तै, चाँदीको मूल्यमा पनि गिरावट आएको छ । बुधबारको तुलनामा आज चाँदी प्रतितोला ६५० रुपैयाँले घटेर ४ हजार २३५ रुपैयाँमा कारोबार भइरहेको महासंघले जनाएको छ ।
अन्तर्राष्ट्रिय बजारमा सुनको माग, अमेरिकी डलरको अवस्था, ब्याजदर, लगानीकर्ताको गतिविधि तथा विश्व बजारमा देखिएको उतारचढावका कारण नेपाली बजारमा पनि सुनचाँदीको मूल्य प्रभावित हुने गरेको छ ।
पछिल्लो समय सुनको मूल्य निरन्तर बढ्दै गएपछि उपभोक्ता र व्यवसायी दुवै प्रभावित भएका थिए । उच्च मूल्यका कारण विवाह तथा अन्य शुभकार्यका लागि सुन खरिद गर्ने ग्राहकको संख्या घटेको व्यवसायीहरूले बताउँदै आएका छन् ।
आजको गिरावटपछि भने केही उपभोक्ताले बजारमा खरिद गर्ने अवसरका रूपमा हेरेका छन् । तर अन्तर्राष्ट्रिय बजारको अवस्थाले आगामी दिनमा सुनको मूल्य फेरि बढ्न वा घट्न सक्ने भएकाले बजारमा अझै अनिश्चितता कायम रहेको छ ।
