चितवन । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनअन्तर्गत सभापति पदमा रवि लामिछाने निर्विरोध चयन हुनुभएको छ।
चितवनमा जारी पार्टीको पहिलो राष्ट्रिय महाधिवेशनमा सभापति पदका लागि तोकिएको उम्मेदवारी दर्ताको समयसीमाभित्र लामिछानेबाहेक अन्य कुनै पनि नेताको उम्मेदवारी नपरेपछि उहाँ एकल उम्मेदवारका रूपमा निर्विरोध निर्वाचित हुनुभएको हो।
पार्टीको केन्द्रीय निर्वाचन समितिका अनुसार सभापति पदका लागि उम्मेदवारी दिने समय समाप्त भएसँगै लामिछाने निर्विरोध भएको घोषणा गरिएको हो। लामिछाने रास्वपाका संस्थापक सभापति समेत हुनुहुन्छ।
महाधिवेशनस्थल चितवनमा नयाँ नेतृत्व चयनको प्रक्रिया जारी रहेको छ। निर्वाचन समितिले सभापति पदको टुंगो लागिसकेपछि अब अन्य पदका लागि निर्वाचन प्रक्रिया अघि बढाएको जनाएको छ।
हाल केन्द्रीय सदस्य पदका लागि मनोनयन दर्ता भइरहेको निर्वाचन समितिले जानकारी दिएको छ। पार्टीको नयाँ नेतृत्व चयनका लागि विभिन्न पदमा उम्मेदवारी दर्ता, दाबी–विरोध र आवश्यक प्रक्रिया पूरा गरिने जनाइएको छ।
रास्वपाले आफ्नो पहिलो राष्ट्रिय महाधिवेशनमार्फत पार्टीको आगामी राजनीतिक दिशा, संगठन विस्तार र नेतृत्व संरचनालाई थप व्यवस्थित गर्ने लक्ष्य राखेको छ। महाधिवेशनमा देशभरबाट आएका प्रतिनिधिहरूको सहभागिता रहेको छ।
सभापतिमा लामिछानेको निर्विरोध चयनसँगै अब पार्टीको अन्य पदाधिकारी तथा केन्द्रीय सदस्यहरूको चयन प्रक्रियातर्फ सबैको ध्यान केन्द्रित भएको छ। नयाँ नेतृत्वले आगामी दिनमा पार्टीको संगठन सुदृढीकरण, जनतासँगको सम्बन्ध विस्तार र राजनीतिक एजेन्डालाई अघि बढाउने अपेक्षा गरिएको छ।
