चितवन । राष्ट्रिय स्वतन्त्र पार्टी (रास्वपा)को नयाँ नेतृत्व चयनका लागि भोलि बुधबार निर्वाचन हुने भएको छ। महाधिवेशनअन्तर्गत आज बन्दसत्र सम्पन्न भएपछि निर्वाचनको सम्पूर्ण प्रक्रिया अघि बढाइने भएको हो।
रास्वपा केन्द्रीय निर्वाचन आयोगका प्रमुख भुवन केसीका अनुसार बन्दसत्र सकिएलगत्तै निर्वाचन कार्यतालिका सार्वजनिक गरिनेछ। आज दिउँसो २ बजेदेखि सुरु हुने बन्दसत्र साँझ ६ः४५ बजे समापन हुने कार्यक्रम रहेको छ। त्यसपछि उम्मेदवारी दर्ता, दाबी–विरोध, उम्मेदवारको अन्तिम नामावली प्रकाशन लगायतका निर्वाचनसम्बन्धी प्रक्रिया सञ्चालन गरिने जनाइएको छ।
यसपटक रास्वपाले नेतृत्व चयनका लागि आधुनिक प्रविधिको प्रयोग गर्दै पूर्ण रूपमा विद्युतीय मतदान प्रणाली अपनाउने भएको छ। मतदानका लागि ८० वटा विद्युतीय उपकरणको व्यवस्था गरिएको छ। निर्वाचनबाट एक जना सभापति र ९९ जना केन्द्रीय सदस्य चयन गरिने निर्वाचन आयोगले जनाएको छ।
महाधिवेशनमा प्रत्यक्ष सहभागी हुन नसकेका विदेशस्थित प्रतिनिधिहरूका लागि पनि मतदानको विशेष व्यवस्था मिलाइएको छ। रास्वपाले विकास गरेको आफ्नै मोबाइल एपमार्फत प्रवासमा रहेका प्रतिनिधिहरूले मतदान गर्न सक्नेछन्। यस व्यवस्थाले विदेशमा रहेका प्रतिनिधिहरूको सहभागिता सुनिश्चित हुने विश्वास गरिएको छ।
निर्वाचनलाई निष्पक्ष, पारदर्शी र व्यवस्थित बनाउन विभिन्न आचारसंहिता तथा मापदण्ड लागू गरिएको निर्वाचन आयोगले जनाएको छ। आयोगका प्रमुख केसीका अनुसार कुनै उम्मेदवारका प्रस्तावक वा समर्थक स्वयं उम्मेदवार बन्न नपाउने व्यवस्था गरिएको छ। यसले निर्वाचन प्रक्रियामा स्वार्थको द्वन्द्व कम गर्न सहयोग पुग्ने अपेक्षा गरिएको छ।
रास्वपाको पहिलो पूर्ण महाधिवेशनमार्फत नयाँ नेतृत्व चयन हुन लागेकाले राजनीतिक वृत्तमा समेत यसको चासो बढेको छ। पार्टीको आगामी दिशा, संगठन विस्तार तथा राष्ट्रिय राजनीतिमा भूमिका निर्धारण गर्ने नेतृत्व चयन हुने भएकाले महाधिवेशनलाई महत्वपूर्ण रूपमा हेरिएको छ।
नयाँ नेतृत्व चयनपछि पार्टीले आगामी निर्वाचन, संगठन सुदृढीकरण तथा नीति निर्माणका विषयमा थप स्पष्ट रणनीति तय गर्ने अपेक्षा गरिएको छ। महाधिवेशन स्थलमा प्रतिनिधि, पर्यवेक्षक तथा कार्यकर्ताहरूको उल्लेख्य सहभागिता रहेको छ भने निर्वाचनलाई सफल बनाउन आवश्यक सम्पूर्ण तयारी पूरा भएको रास्वपाले जनाएको छ।
