काठमाडाैं । प्रहरीले रुपन्देहीका विभिन्न स्थानबाट बेपत्ता भएका व्यक्तिको खोजीकार्यलाई उच्च प्राथमिकताका साथ अघि बढाएको छ ।
जिल्ला प्रहरी कार्यालय रुपन्देहीले गत जेठ महिनामा हराएको भनेर निवेदन परेका १ सय ८ जनामध्ये ६१ जनालाई फेला पारी परिवारसँग सम्पर्क गराइएको जनाएको हाे । प्रहरीले जेठ महिनामा हराएका मध्ये ३० बालबालिका, ४८ महिला र ३० जना पुरुष रहेको जनाएको छ ।
कार्यालयका सूचना अधिकारी कृष्णकुमार चन्दले जसमध्ये १८ बालबालिका, २९ महिला र १४ जना पुरुष फेला परेकाे बताउनुभयाे । त्यस्तै, अघिल्लो आर्थिक वर्षको पुस महिनादेखि खोजीको सूचीमा रहेका थप नौ जनालाई समेत पछिल्लो अवधिमा फेला पारी परिवारको जिम्मा लगाइएको प्रहरीले जनाएको छ । परिवारको जिम्मा लगाइएकामा दुई बालिका, पाँच महिला र दुई पुरुष रहेका थिए ।
जिल्लामा बेपत्ताको खोजी तथा उद्धारलाई चुस्ततुस्त तुल्याउन थप प्रहरी परिचालन गरिएको र हराएका व्यक्तिको खोजी कार्य निरन्तर जारी रहेको सूचना अधिकारी चन्दले बताउनुभयाे ।
