काठमाडौँ । नेपाली कम्युनिष्ट पार्टीका प्रमुख सचेतक युवराज दुलालले सरकारले ल्याएको बजेटले संविधानको मर्म, नेपाली अर्थतन्त्रको यथार्थ र किसान–मजदुरको आवश्यकता सम्बोधन गर्न नसकेको बताउनुभएको छ ।
बिहीवार बसेको प्रतिनिधिसभाको बैठकमा बजेटमाथिको सैद्धान्तिक छलफल उहाँले बजेटको आर्थिक दृष्टिकोण नै स्पष्ट नभएको टिप्पणी गर्नुभएको हो । उहाँले बजेटले किसान, मजदुर, बेरोजगार युवा र गरिब नागरिकको अपेक्षा सम्बोधन गर्न नसकेको दाबी गर्नुभयो ।
उहाँले भीर–पहिरो र आधारभूत सेवाबाट वञ्चित हजारौं बस्तीलाई सुरक्षित र व्यवस्थित स्थानमा पुनस्र्थापना गर्न बजेटले कुनै कार्यक्रम नल्याएको बताउनु भयो । बाँदर आतंकका कारण किसान बाली जोगाउन नसक्ने अवस्थामा पुगेपनि बजेटले त्यस विषयलाई बेवास्ता गरेको उहाँको भनाई छ । उत्पादनमा आधारित कृषि अनुदान, बाली तथा पशुधन बीमा, किसान पेन्सन र बाँदर नियन्त्रण कार्यक्रम आवश्यक रहेको उहाँले बताउनुभयो ।
स्वास्थ्य क्षेत्रमा पहिलो पटक उपचार सेवामा प्रत्यक्ष कर लगाइएको भन्दै उहाँले असन्तुष्टी जनाउनु भयो । सरकारी तथ्यांकअनुसार करिव ५९ लाख नागरिक निरपेक्ष गरिबीमा रहेको उल्लेख गर्दै उहाँले गरिबको जीवनस्तर उकास्ने ठोस कार्यक्रम बजेटमा नदेखिएको बताउनुभयो ।
उहाँले बजेटको कर प्रणाली पनि प्रगतिशील नभई प्रतिगामी रहेको दाबी गर्नुभयो । अप्रत्यक्ष कर र भ्याटको भारले गरिब किसान तथा मजदुर झन् दबाबमा पर्ने उहाँको भनाई छ । विद्युत उपभोगमा भ्याट लगाएर सरकारले स्वदेशी ऊर्जाभन्दा ग्यासलाई सस्तो बनाएको उहाँले आरोप लगाउनुभयो ।
अब नागरिकले विद्युत् प्रयोग गरून् कि ग्यास ? उहाँको प्रश्न छ ।
उहाँले मेलम्ची खानेपानी आयोजनाबाट प्रभावित क्षेत्रका मागहरू पनि बजेटमा नसमेटिएकोे गुनासो गर्नुभयो । यस्तै उहाँले वैदेशिक ऋणको विषयमा विगतमा सरकारको आलोचना गर्नेहरूले अहिले झन् बढी ऋण प्रश्ताव गरेको उल्लेख गर्नुभयो ।
