काठमाडौँ । नेपाली बजारमा सोमबार सुनको मूल्य सामान्य रूपमा घटेको छ भने चाँदीको मूल्यमा वृद्धि भएको छ।
नेपाल सुनचाँदी व्यवसायी महासंघका अनुसार आइतबारको तुलनामा सोमबार सुनको मूल्य प्रतितोला २ सय रुपैयाँले घटेको हो। सोमबार छापावाल सुन प्रतितोला ३ लाख १० हजार ९ सय रुपैयाँ मा कारोबार भइरहेको महासंघले जनाएको छ।
यसअघि आइतबार सुनको मूल्य प्रतितोला ३ लाख ११ हजार १ सय रुपैयाँ कायम भएको थियो। पछिल्ला दिनहरूमा अन्तर्राष्ट्रिय बजारमा देखिएको उतारचढावको प्रभाव नेपाली बजारमा पनि परेको व्यवसायीहरू बताउँछन्।
यता चाँदीको मूल्य भने बढेको छ। आइतबार प्रतितोला ५ हजार ३ सय ४५ रुपैयाँ मा कारोबार भएको चाँदी सोमबार ५ हजार ३ सय ५५ रुपैयाँ मा कारोबार भइरहेको छ। यससँगै चाँदीको मूल्य प्रतितोला १० रुपैयाँले वृद्धि भएको हो।
महासंघका अनुसार अन्तर्राष्ट्रिय बजारमा सोमबार सुन प्रतिऔंस ४ हजार ५ सय २१ अमेरिकी डलर हाराहारीमा कारोबार भइरहेको छ। विश्व बजारमा सुनको मूल्यमा हुने परिवर्तन, अमेरिकी डलरको अवस्था, केन्द्रीय बैंकहरूको मौद्रिक नीति तथा विश्व आर्थिक परिस्थितिले सुनचाँदीको मूल्य निर्धारणमा प्रत्यक्ष प्रभाव पार्ने गर्दछ।
पछिल्लो समय सुनको मूल्य उच्च विन्दु नजिक रहँदा लगानीकर्ता, व्यवसायी तथा उपभोक्ताले बजारको गतिविधिलाई नजिकबाट नियालिरहेका छन्। बजार विश्लेषकहरूका अनुसार अन्तर्राष्ट्रिय बजारमा आउने उतारचढावका आधारमा आगामी दिनमा पनि सुनचाँदीको मूल्यमा परिवर्तन हुन सक्ने सम्भावना रहेको छ।
