काठमाडौं । सरकारले विदेशमा रहेका नेपाली नागरिकका लागि कन्सुलर सेवा थप सहज, सरल र प्रविधिमैत्री बनाउने उद्देश्यसहित ‘मोफा मित्र’ एप सञ्चालनमा ल्याएको छ ।
कन्सुलर सेवा विभागमा मंगलबार आयोजित कार्यक्रममा परराष्ट्रमन्त्री शिशिर खनालले एपको शुभारम्भ गरेका हुन् ।
एपमार्फत विदेशमा रहेका नेपाली तथा उनका आफन्तले अनलाइन निवेदन दर्ता गर्न, गुनासो राख्न तथा सम्बन्धित नेपाली नियोगसँग सहज सम्पर्क र समन्वय गर्न सक्ने व्यवस्था गरिएको छ ।
मन्त्री खनालका अनुसार विदेशमा रहेका नेपालीहरूको यकिन तथ्याङ्क अभावका कारण उद्धार र सहायतामा समस्या देखिएकाले विभिन्न स्रोतबाट तथ्याङ्क संकलन सुरु गरिएको छ, जसले भविष्यमा आपतकालीन उद्धार र कन्सुलर सहायता प्रभावकारी बनाउन सहयोग गर्नेछ ।
उनले करिब ५० लाख नेपाली विदेशमा रहेको अनुमान गर्दै आपत्कालीन अवस्थामा सरकारसँग कसरी सम्पर्क गर्ने भन्ने अन्योल हटाउन एउटै डिजिटल प्लेटफर्म आवश्यक भएको बताए ।
एपमार्फत गुनासोको अवस्था ट्र्याक गर्न सकिने तथा समयमै सम्बोधन नभए थप पहल गर्न सकिने सुविधा पनि रहेको मन्त्रालयले जनाएको छ । मन्त्री खनालले आगामी दिनमा एपलाई थप विस्तार र परिमार्जन गर्दै लैजाने बताए ।
यससँगै परराष्ट्र मन्त्रालयले ‘लिगल नेपाल कन्सुलर जिओभी एनपी’ नामक अनलाइन प्रणाली पनि सञ्चालनमा ल्याएको छ, जुन हाल सबै प्रदेश, जिल्ला प्रशासन कार्यालय तथा करिब पाँच सय स्थानीय तहमा विस्तार भइसकेको छ ।
उक्त प्रणालीमार्फत विदेशमा समस्यामा परेका, अलपत्र वा जेलमा रहेका नेपालीको उद्धार, शव व्यवस्थापन, बीमा तथा क्षतिपूर्ति दाबी लगायतका कार्यमा सहजीकरण हुँदै आएको मन्त्रालयले जनाएको छ ।
