काठमाडौं । नेपाल क्रिकेट संघ (क्यान)ले आगामी एसियन गेम्स क्रिकेट छनोट प्रतियोगिताका लागि दीपेन्द्र सिंह ऐरीको कप्तानीमा नेपाली राष्ट्रिय टोली घोषणा गरेको छ। सिंगापुरमा मे ३१ देखि सुरु हुने प्रतियोगिता जुन ९ सम्म सञ्चालन हुनेछ।
घोषित टोलीमा यसअघि यूएईविरुद्धको शृङ्खलामा अनुपस्थित रहेका रोहित पौडेल, सोमपाल कामी र करण केसी पुनः टोलीमा फर्किएका छन्। अनुभवी खेलाडीहरूको पुनरागमनले नेपाली टोली थप सन्तुलित र बलियो बनेको विश्लेषण गरिएको छ।
टोलीमा कुशल भुर्तेल, आसिफ शेख, सन्दीप जोरा, कुशल मल्ल, लोकेश बम, सन्दीप लामिछाने, शेर मल्ल, नन्दन यादव, आरिफ शेख तथा साहब आलम समावेश छन्।
क्यानले युवा र अनुभवी खेलाडीको मिश्रणसहित टोली तयार गरेको जनाएको छ। छनोट प्रतियोगितामा उत्कृष्ट प्रदर्शन गर्दै नेपालले एसियन गेम्स क्रिकेटमा स्थान सुरक्षित गर्ने लक्ष्य राखेको छ। नेपाली समर्थकहरूले पनि टोलीबाट सशक्त प्रदर्शनको अपेक्षा गरेका छन्।
