काठमडाैं । नेपाली कम्युनिष्ट पार्टीका सांसद वर्षमान पुनले प्रस्तावित प्रधानन्यायाधीश डा. मनाेज कुमार शर्माको संसदीय सुनुवाई प्रक्रियालाई परिपक्व, पारदर्शी र जवाफदेही बनाउनुपर्नेमा जोड दिनुभएको छ ।
सिंहदरबारमा मंगलबार बसेकाे संसदीय सुनुवाई समितिको बैठकमा बोल्दै सांसद पुनले यस्ताे बताउनुभएकाे हाे । निर्धारित कार्यतालिका अनुसार नै प्रक्रिया अघि बढाउन सुझाव दिनुभएकाे छ। उहाँले प्रस्तावित प्रधानन्यायाधीश शर्माविरुद्ध प्राप्त उजुरीहरू र उहाँको कार्ययोजनामाथि गहन अध्ययन गर्न आवश्यक रहेको बताउनुभयो । प्राप्त उजुरी र कार्ययोजनाहरू अध्ययन गर्ने र बुधबारदेखि निरन्तर सुनुवाईको प्रक्रिया अघि बढाउनु उपयुक्त हुने प्रस्ताव उहाँले राख्नुभएको छ ।
सांसद पुनले प्रस्तावित प्रधानन्यायाधीश शर्माको ६ वर्षको कार्यकाल रहने सन्दर्भमा उहाँको भावी कार्ययोजना र न्यायालय सुधारको प्रतिवद्धता महत्वपूर्ण हुने बताउनुभयाे । उहाँले संवैधानिक व्यवस्था अनुसार प्रस्तावित नाम अनुमोदनका लागि बहुमत र अस्वीकृत गर्न दुई–तिहाइ मत आवश्यक पर्ने कुरालाई समेत स्मरण गराउनुभएकाे छ।
सांसद पुनले समितिको निर्णय प्रक्रिया विवेकपूर्ण र वस्तुनिष्ठ हुनुपर्नेमा जोड दिनुभयो ।
