काठमाडौं । नेकपा (एमाले)का उपाध्यक्ष एवं संसदीय दलका नेता रामबहादुर थापा बादलले पार्टी अध्यक्ष केपी शर्मा ओलीको रक्षा गर्दै अघि बढ्नु अहिले सिंगो पार्टी पंक्तिको मुख्य जिम्मेवारी भएको बताएका छन् ।
आइतबार मदन आश्रित स्मृति सभाको अवसरमा काठमाडौंको बल्खुस्थित मदन नगरमा आयोजित कार्यक्रममा बोल्दै उपाध्यक्ष थापाले एमाले र त्यसको नेतृत्वलाई समाप्त पार्ने उद्देश्यका साथ देशी–विदेशी शक्तिहरू सक्रिय रहेको आरोप लगाए । उनले एमाले र अध्यक्ष ओलीको रक्षा गर्नु ऐतिहासिक जिम्मेवारीका रूपमा आएको बताए ।
उनले पछिल्लो समय देखिएका राजनीतिक घटनाक्रमहरू दासढुंगा हत्याकाण्डकै निरन्तरता भएको दाबी गरे । जेनजी आन्दोलन, निर्वाचन, सरकारका निर्णय तथा अध्यक्ष ओलीमाथि भइरहेका गतिविधिहरूलाई उनले एउटै श्रृंखलाका रूपमा व्याख्या गरे ।
थापाले सरकारले ल्याएको अध्यादेश, मन्त्रिपरिषद्का निर्णय तथा अध्यक्ष ओलीमाथि लगाइएका मुद्दाको प्रकृतिबारे प्रश्न उठाउँदै ती घटनाहरूलाई एमालेविरुद्धको योजनाबद्ध अभियानको हिस्सा भएको टिप्पणी गरे ।
“यी सबै घटनाक्रम दासढुंगा घटनाकै निरन्तरता हुन् । नेकपा एमाले र त्यसको नेतृत्वलाई समाप्त पार्ने अभियान सञ्चालन भइरहेको छ,” उनले भने, “त्यसकारण एमाले र नेतृत्वको रक्षा गर्ने गम्भीर ऐतिहासिक जिम्मेवारी हाम्रो काँधमा आएको छ ।”
उपाध्यक्ष थापाले एमाले र पार्टी नेतृत्वमाथि निरन्तर आक्रमण भइरहेको दाबी गर्दै त्यसविरुद्ध पार्टी पंक्तिलाई सचेत र संगठित भएर लाग्न आग्रह गरे ।
