काठमाडौँ । नेपाली कम्युनिष्ट पार्टीनिकट अखिल नेपाल सुकुम्वासी संघले सुकुम्वासी तथा अव्यवस्थित बस्ती खालि गराउने सरकारको कदमविरुद्ध आन्दोलन गर्ने भएको छ ।
संघले बुधवार काठमाडौँमा पत्रकार सम्मेलन गर्दै गुठी तथा बिर्ता पीडित समुदायमाथि भइरहेको जबरजस्ती उठीबास र डोजर अभियानविरुद्ध आन्दोलन गर्ने जानकारी दिएको हो ।
पत्रकार सम्मेलनमा बोल्दै संघका अध्यक्ष अमर परियारले अदालतले सुकुम्वासी बस्ती खाली नगराउन अन्तरिम आदेश दिइसक्दा पनि कोहलपुरमा सुकुम्वासी बस्तीमाथि डोजर चलाउने काम भएको भन्दै आपत्ति जनाए ।
सरकारले सर्वोच्च अदालतको आदेशमाथि धावा बोल्ने काम गरेको भन्दै उनले उक्त कुराको निन्दा गरे । उनले सरकार मात्र नभई नेपाली सेना आफैँ विवादमा आउने गरेर हस्तक्षेप गरेको भन्दै त्यसका विरुद्ध संघर्ष गरिने बताए । उनले यही संघले यही वैशाख ११ गते घोषणा गरेको आन्दोलनका कार्यक्रमलाई निरन्तरता दिँदै वैशाख ३१ गतेदेखि थप संघर्षका कार्यक्रम सञ्चालन गरिने बताए ।
उनले वैशाख ३१ गते बिहान ६ बजेदेखि १० बजेसम्म सवारी साधन सञ्चालन नगरी आन्दोलनलाई सहयोग गर्न यातायात व्यवसायी र सर्वसाधारणलाई पनि आग्रह पनि गरे । उनले प्रधानमन्त्री बालेन्द्र साह नेतृत्वको सरकारमाथि अध्यादेशमार्फत शासन चलाउन खोजेको, नेपाली सेनालाई विवादमा तान्ने प्रयास गरेको तथा राष्ट्रपति र संसदको गरिमा कमजोर पार्ने काम भइरहेको आरोप पनि लगाए ।
उनले सत्तारुढ दल राष्ट्रिय स्वतन्त्र पार्टीले अभ्यास गर्ने भनेको प्रत्याह्वानमार्फत प्रधानमन्त्री एवं रास्वपा संसदीय दलको नेताबाट शाहलाई फिर्ता बोलाउन माग समेत गरे ।
