काठमाडौं । राष्ट्रपति रामचन्द्र पौडेलले संवैधानिक परिषद् सम्बन्धी अध्यादेश जारी गरेका छन् ।
सरकारले पुनः सिफारिस गरेपछि राष्ट्रपति पौडेलले उक्त अध्यादेश जारी गरेका हुन् । यसअघि सरकारले सिफारिस गरेका आठमध्ये सात अध्यादेश स्वीकृत गरेका राष्ट्रपति पौडेलले संवैधानिक परिषद्सम्बन्धी अध्यादेश भने पुनर्विचारका लागि फिर्ता पठाएका थिए ।
सोही अध्यादेशलाई सोमबार बसेको मन्त्रिपरिषद् बैठकले जस्ताको तस्तै पुनः सिफारिस गरेको थियो । त्यसपछि राष्ट्रपतिले मंगलबार अध्यादेश जारी गरेका हुन् ।
अध्यादेशमा संवैधानिक परिषद्को बैठकका लागि कम्तीमा चार सदस्य उपस्थित भए पुग्ने र उपस्थित सदस्यहरूको बहुमतबाट निर्णय गर्न सकिने व्यवस्था गरिएको छ ।
प्रधानमन्त्रीको अध्यक्षतामा रहने संवैधानिक परिषद् ६ सदस्यीय हुन्छ । परिषद्मा प्रधानमन्त्री, प्रमुख प्रतिपक्ष दलका नेता, प्रधानन्यायाधीश, प्रतिनिधि सभाका सभामुख, उपसभामुख र राष्ट्रिय सभाका अध्यक्ष सदस्य रहने व्यवस्था छ ।
