काठमाडाैं । २० औं लोकतन्त्र दिवसलाई शुक्रबार विविध कार्यक्रमकाे आयाेजना गरी मनाइँदैछ ।
२०६२/६३ सालको दोस्रो जनआन्दोलनको बलमा तत्कालिन राजा ज्ञानेन्द्र शाहले जनताको नासो जनतालाई सुम्पने भन्दै प्रतिनिधि सभा पुर्नस्थापना गरेको खुशीयालीमा यो दिवस मनाउने गरिएको हाे। २०५९ साल जेठ ८ गते संसद विघटन गर्नुभएका शाहले २०६१ साल माघ १९ गते शासनसत्ता आफ्नै हातमा लिनुभएपछि सात राजनीतिक दलहरुको अगुवाईमा आन्दोलन शुरु भएको थियो ।
शसस्त्र विद्रोहमा रहेको तत्कालिन माओवादी र आन्दोलनरत सात दलबीच १२ बुँदे समझदारी भएपछि आन्दोलनले गति लिएको थियो । २०६२ साल फागुनदेखि पूर्वप्रधानमन्त्री एवं नेपाली कांग्रेसका तत्कालीन सभापति गिरिजाप्रसाद कोइरालाको नेतृत्वमा शुरु भएको निर्णायक आन्दोलनले आजकै दिन सफलता प्राप्त गरेको थियो ।
आन्दोलनरत दलले गरेकै मस्यौदाका आधारमा राजा शाहले वैशाख ११ गते राति संसद् पुनर्स्थापनाको घोषणा गरी बैठक समेत आह्वान गर्नुभयो । साेही दिनलाई लोकतन्त्र दिवसको रुपमा मनाउने गरिएको छ ।
