काठमाडौं:
राष्ट्रिय स्वतन्त्र पार्टी (रास्वपा) को केन्द्रीय समिति बैठक सुरु भएको छ।
पार्टीका प्रवक्ता मनिष झा का अनुसार आजको बैठकका लागि ९ वटा एजेन्डा तय गरिएको छ। बैठकमा पार्टी गतिविधिको ब्रिफिङ र केन्द्रीय सदस्यहरूको रिपोर्टिङ हुनेछ, जसका लागि २० जनालाई २ मिनेटका दरले समय छुट्याइएको छ।
त्यस्तै, महाधिवेशन कार्यविधिको मस्यौदा, विधान संशोधन, स्थानीय तह उम्मेदवार क्लब गठन तथा आवेदन आह्वानका विषयमा पनि छलफल हुने जनाइएको छ।
बैठकमा प्रवासमा रहेका नेपालीलाई विदेशबाटै मताधिकार दिने व्यवस्था, सचिवालयका निर्णय अनुमोदन लगायतका विषयमा पनि छलफल भइरहेको छ।
रास्वपाले विविध शीर्षकअन्तर्गत तीन प्रस्तावमा समेत छलफल गर्ने जनाएको छ, जसमा विभिन्न आयोग तथा निकायबाट प्राप्त पत्राचार, विषयगत विभागको योजना तयारी, नीति मन्थन र संसदीय दलको विधान संशोधनसम्बन्धी विषयहरू समावेश छन्।
