काठमाडौं:
राष्ट्रिय जेन–जी नागरिक अभियानले पेट्रोलियम पदार्थको मूल्य घटाउन माग गर्दै नेपाल आयल निगम लाई पाँच बुँदे ज्ञापनपत्र बुझाएको छ।
सोमबार अभियानका प्रतिनिधिहरू निगमको कार्यालय पुगेर ज्ञापनपत्र बुझाएका हुन्। यसअघि शनिबार काठमाडौंमा पत्रकार सम्मेलन गर्दै २४ घण्टाभित्र मूल्य नघटाए निगम घेराउ गर्ने चेतावनी दिइएको थियो।
अभियानका प्रवक्ता वीरजंग विश्वकर्मा ले इण्डियन आयल कर्पोरेशन बाट खरिद गरिने पेट्रोलियम पदार्थको मूल्य निर्धारण प्रक्रिया अपारदर्शी रहेको आरोप लगाउँदै खरिद मूल्य, कर संरचना र मूल्यसूची सार्वजनिक गर्न माग गर्नुभयो।
उनका अनुसार मूल्य स्थिरीकरण कोष तत्काल प्रयोग गरी उपभोक्तालाई राहत दिनुपर्ने, प्रशासनिक खर्च कटौती गर्नुपर्ने, कालोबजारी तथा कृत्रिम अभाव नियन्त्रणका लागि कडा अनुगमन गर्नुपर्ने र वर्तमान आर्थिक संकट अन्त्य नभएसम्म मूल्यवृद्धि पूर्ण रूपमा रोक्नुपर्ने माग गरिएको छ।
उहाँले सरकारले इन्धनमा कर तथा भन्सार छुट दिने निर्णय गरे पनि त्यसको प्रत्यक्ष लाभ उपभोक्तासम्म नपुगेको गुनासो गर्नुभयो।
ज्ञापनपत्र बुझाउन पुगेका अभियानका सदस्यहरूले केही समय निगम परिसरमा नाराबाजी समेत गरेका थिए भने प्रहरीले उनीहरूलाई नियन्त्रणमा राख्दै स्थिति सामान्य बनाएको थियो।
