काठमाडौं ।
दक्षिण तथा मध्य एशिया मामिला हेर्ने अमेरिकी सहायक विदेश मन्त्री समीर पल कपुरको नेपाल भ्रमण तय भएको छ ।
बालेन शाह नेतृत्वको सरकार गठन भएपछि नेपाल आउन लागेका कपुर अमेरिकी सरकारका सबैभन्दा उच्च अधिकारी हुन । नेपाल भ्रमणको लागि मात्र भनेर कपुर अमेरिका बाहिर निस्किन लागेको बताइएको छ ।
अमेरिकी विदेशमन्त्री तथा उच्च अधिकारीहरु प्रायः भारत, पाकिस्तान, बंगलादेश वा अन्य दक्षिण, दक्षिण पूर्वी एशियाका देशको भ्रमण क्रममा काठमाडौँ आउने गर्थे । सहायक विदेशमन्त्री पल अमेरिकाबाट इस्तानबुल ट्रान्जिट भएर सिधै काठमाडौं अवतरण हुनेछन् । परराष्ट्र मन्त्रालय स्रोतका अनुसार कपुर सोमबार आएर बुधबार फर्किने तालिका छ ।
काठमाडौं रहँदा उहाँले बालेन सरकारको आर्थिक प्राथमिकता बारे अर्थमन्त्री डा.स्वर्णिम वाग्लेसँग छलफल गर्ने तथा मिलेनियम च्यालेन्ज करपोरेसन (एमसीसी) को नेपाल कम्प्याक्ट बारे परामर्श गर्नुहुनेछ ।
काठमाडौं रहँदा सहायक विदेशमन्त्री कपुरले को कोसँग भेट्नेछन्, कुन समय र कुन विषयमा वार्ता गर्नेछन् भन्नेबारे कार्यसूची बनाउन काम भइरहेको मन्त्रालयले जनाएको छ।
