काठमाडाैं । काठमाडाैंमा वैशाख १ गतेदेखि रात्रिकालीन बस सेवा सञ्चालन हुने भएकाे छ ।
काठमाडाैं महानगरपालिकाले साझा यातायातसँगको सहकार्यमा मंगलबार राति ८ बजेदेखि ११ बजेसम्म रात्रिकालीन बस सेवा सञ्चालनमा आउन लागेको हो । महानगरले शुरुमा दुई वटा रुटमा बस सञ्चालन गर्ने तयारी गरेकाे छ। ललितपुरको लगनखेल, पाटन अस्पताल, अल्का, नर्भिक, प्रसूति गृह, ट्रमा सेन्टर, वीर अस्पताल, कान्ति अस्पताल, टिचिङ् अस्पताल र गंगालाल हृदय केन्द्र हुँदै बूढानीलकण्ठसम्म एउटा रुट हुने महानगरले जनाएकाे हाे ।
त्यस्तै थानकोटदेखि सतुंगल, कलंकी, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन र तीनकुने हुँदै अन्तर्राष्ट्रिय त्रिभवन विमानस्थलसम्म अर्को रुटमा रात्री बस सञ्चालन गरिने भएकाे छ । यी दुई रुटमा ४ वटा रात्रीकालीन विद्युतीय बस सञ्चालन हुने भएका हुन् । तोकिएको रुटका बस स्टपहरुमा हरेक २० मिनेटको अन्तरमा बस आउनेछन् । बसमा सीसीटिभी क्यामरा जडान हुने समेत महानगरले जनाएकाे छ ।
साथै सुरक्षाका लागि नगर प्रहरी हुने समेत महानगरले जानकारी गराएकाे हाे ।
