काठमाडौँ । प्रतिनिधिसभा सञ्चालन नियमावली मस्यौदा समितिको बैठक आइतबार पनि सिंहदरबारमा जारी छ ।
समितिले प्रतिनिधिसभाको नयाँ नियमावली तर्जुमा गर्ने कार्य गरिरहेको छ । गणेश पराजुली को सभापतित्वमा गठित १५ सदस्यीय समितिको बैठकले संसद सञ्चालनका लागि आवश्यक संशोधन र नयाँ प्रावधानहरूका विषयमा छलफल गरिरहेको छ ।
समितिका सदस्यहरूले नियमावलीका विभिन्न अध्याय तथा दफाहरूमा संशोधन प्रस्ताव ल्याउँदै त्यसमा विस्तृत छलफल गरिरहेका छन् । बैठकमा नियमावलीलाई समसामयिक बनाउने, संसदीय प्रक्रियालाई थप प्रभावकारी र पारदर्शी बनाउने विषयमा विशेष जोड दिइएको छ ।
समिति गठन भएपछि नियमावली मस्यौदा तयार पार्ने काम तीव्र रूपमा अघि बढिरहेको छ । बैठकको निष्कर्षअनुसार नयाँ नियमावली प्रतिनिधिसभामा पेश हुने अपेक्षा गरिएको छ ।
बैठकमा समितिका सबै सदस्यहरूको सक्रिय सहभागिता रहेको छ ।
