काठमाडाैं ।
पूर्वप्रधानमन्त्री माधवकुमार नेपालले पार्टीको संगठनात्मक एकीकरणको बाँकी काम एक हप्ताभित्रै सम्पन्न गर्नेगरी पहल भइरहेको बताएका छन्।
अखिल नेपाल महिला संघ (क्रान्तिकारी) को कार्यक्रममा बोल्दै उनले निर्वाचन परिणाम अपेक्षाविपरीत आएको स्वीकार गर्दै गम्भीर समीक्षा आवश्यक रहेको बताए। उनले कार्यकर्ताहरूको सक्रियता र इमान्दारितामाथि प्रश्न उठाउँदै आत्ममन्थन गर्न आग्रह गरे।
उनले हाल ४५ सदस्यीय केन्द्रीय समन्वय समितिको बैठक सात दिनदेखि जारी रहेको र राष्ट्रिय समस्या, राजनीतिक संकट तथा कम्युनिष्ट आन्दोलनका चुनौतीबारे छलफल भइरहेको जानकारी दिए।
नेपालले कम्युनिष्टहरूको भूमिका नेपालको राजनीतिमा महत्वपूर्ण रहेको उल्लेख गर्दै महिला हिंसा, दलितमाथिको अत्याचार र गरिबीविरुद्ध सक्रिय हुन महिला संगठनलाई निर्देशन दिए।
उनले पार्टीभित्रको पुरानो सोच परिवर्तन गरी नयाँ परिस्थितिअनुसार अघि बढ्नुपर्नेमा जोड दिँदै एकताले मात्र सबै सम्भव नहुने र आफ्नै खुट्टामा उभिनुपर्ने बताए।
