काठमाडौं । वसन्त ऋतुको आगमनसँगै भोजपुर का वन–जङ्गल यतिबेला गुराँसले राताम्य बनेका छन् । विशेषगरी मुन्दुम पदमार्ग क्षेत्रमा ढकमक्क फुलेका गुराँसले प्राकृतिक सौन्दर्यलाई झन् आकर्षक बनाएको छ ।
यस पदमार्गका जङ्गलहरू अहिले रातो, गुलाबी र सेतो गुराँसका विभिन्न प्रजातिले ढाकिएका छन् । हरिया बनजङ्गलमाथि गुराँसको रङ मिसिँदा देखिने दृश्यले पदयात्रामा निस्किएका पर्यटकलाई लोभ्याउने गरेको छ ।
मुन्दुम पदमार्ग प्राकृतिक सौन्दर्य मात्र नभई सांस्कृतिक र धार्मिक दृष्टिले पनि महत्वपूर्ण मानिन्छ । किराँत समुदायको मौलिक संस्कार, परम्परा र ‘मुन्दुम’सँग जोडिएको यो क्षेत्रले स्थानीय जीवनशैलीको झल्को दिन्छ ।
पदयात्राका क्रममा पर्यटकहरूले स्थानीय भाषा, वेशभूषा र परम्परागत जीवनशैली नजिकबाट अनुभव गर्न सक्ने बताइएको छ । यसै कारण पछिल्लो समय यहाँ भ्रमण गर्ने आन्तरिक तथा बाह्य पर्यटकको संख्या बढ्दै गएको छ ।
वसन्त ऋतु पदयात्राका लागि उपयुक्त समय भएकाले अहिले पर्यटकको चहलपहल उल्लेख्य रूपमा बढेको स्थानीय तहका जनप्रतिनिधिहरूले बताएका छन् । पर्यटकलाई लक्षित गर्दै चखेवामा रैथाने खाना महोत्सवसमेत आयोजना गरिएको छ ।
यस पदमार्गअन्तर्गत पर्ने टेम्केडाँडा, साल्पा पोखरी, सिलिचुङ र मैयुङडाँडाजस्ता पर्यटकीय स्थलहरू यतिबेला झन् आकर्षक बनेका छन् । यी स्थानहरूबाट देखिने हिमाली दृश्य, धार्मिक महत्व र शान्त वातावरणले पर्यटकलाई विशेष अनुभव दिने गरेको छ ।
स्थानीय होटल तथा होमस्टे व्यवसायीका अनुसार गुराँस फुल्ने याम सुरु भएसँगै पर्यटक आगमन बढेको छ । पर्यटकको मागअनुसार बसोबास, खाना र मार्गदर्शन सेवा विस्तार गरिएको छ ।
पछिल्लो समय पदमार्गमा पूर्वाधार विकास पनि सुधार हुँदै गएको छ । पदमार्ग चिन्हाङ्कन, विश्रामस्थल निर्माण र सूचना बोर्ड स्थापनाले पर्यटकलाई सहजता प्रदान गरेको छ ।
प्राकृतिक सौन्दर्य, जैविक विविधता र सांस्कृतिक सम्पदाको संगम बनेको मुन्दुम पदमार्ग वसन्त ऋतुमा अझ रमणीय गन्तव्यका रूपमा स्थापित हुँदै गएको छ । यहाँ पुग्ने जो कोहीका लागि यो यात्रा अविस्मरणीय बन्ने स्थानीयको भनाइ छ ।
