काठमाडौं : केपी शर्मा ओली र रमेश लेखक को बन्दीप्रत्यक्षीकरण रिटमा आज सुनुवाइ
पूर्वप्रधानमन्त्री केपी शर्मा ओली र पूर्व गृहमन्त्री रमेश लेखकले दायर गरेको बन्दीप्रत्यक्षीकरण रिटमा आज सर्वोच्च अदालत मा सुनुवाइ हुने भएको छ।
यसअघि अदालतले जारी गरेको कारण देखाउ आदेशपछि सरकार पक्षबाट लिखित जवाफ पेश भइसकेको छ। अब मुद्दाका सबै प्रक्रिया पूरा भइसकेकाले रिट पेसीमा चढेर आज बहस हुने बताइएको छ।
जेनजी आन्दोलनसँग सम्बन्धित घटनाको छानबिन गर्न बनेको गौरीबहादुर कार्की आयोग को प्रतिवेदन कार्यान्वयन गर्ने सरकारी निर्णयअनुसार प्रहरीले चैत १४ गते दुवै नेतालाई पक्राउ गरेको थियो।
उक्त पक्राउ गैरकानूनी भएको दाबी गर्दै दुवैले चैत १५ गते सर्वोच्च अदालतमा रिट दायर गरेका थिए। त्यसपछि चैत १६ गतेको प्रारम्भिक सुनुवाइमा अदालतले सरकारका नाममा कारण देखाउ आदेश जारी गरेको थियो।
अब लिखित जवाफ प्राप्त भइसकेकाले आज हुने सुनुवाइले मुद्दाको आगामी दिशा तय गर्ने अपेक्षा गरिएको छ।
