काठमाडौं । नेकपा एमाले का सांसद सुहाङ नेम्वाङ ले संसदीय दलको नेता चयन प्रक्रियालाई पार्टीभित्रको स्वाभाविक लोकतान्त्रिक अभ्यासका रूपमा लिनुपर्ने बताउनुभएको छ।

निर्वाचनको नतिजापछि प्रतिक्रिया दिँदै उहाँले यस प्रक्रियालाई नकारात्मक रूपमा नहेर्न आग्रह गर्नुभयो। नेम्वाङले संसदमा सत्तापक्ष वा प्रतिपक्षको सीमाभन्दा माथि उठेर देश र जनताको हितमा काम गर्नुपर्नेमा जोड दिनुभयो।

उहाँले सरकारका सकारात्मक कामलाई सहयोग गर्ने र कमजोरीहरूलाई रचनात्मक रूपमा आलोचना गर्दै खबरदारी गर्ने नीति रहने स्पष्ट पार्नुभयो। साथै युवा पुस्ता र शुभेच्छुकहरूलाई निराश नहुन आग्रह गर्दै यो आफ्नो पहिलो प्रयास मात्र भएको र भविष्यमा पनि सक्रिय रहने प्रतिबद्धता जनाउनुभयो।

उहाँले भन्नुभयो, “पार्टीभित्र दलको नेता चयन गर्दा हामीले लोकतान्त्रिक अभ्यास अपनाएका हौँ। कुनै दबाब थिएन। नतिजा अपेक्षाअनुसार नभए पनि अर्को उम्मेदवार योग्य ठहरिएर आएको हुन सक्छ, जसलाई स्वीकार्नुपर्छ।”

नेम्वाङले यस नतिजाले पार्टीभित्रका कमजोरी सुधार गर्ने र आत्मसमीक्षा गर्ने अवसर प्रदान गरेको उल्लेख गर्दै यसले भविष्यमा पार्टीलाई अझ सुदृढ बनाउने विश्वास व्यक्त गर्नुभयो। साथै एमालेले देशको समृद्धि र जनताको मुद्दा उठाउने कार्य निरन्तर गर्ने पनि उहाँले बताउनुभयो।