काठमाडौं । नेपाली कांग्रेसको केन्द्रीय कार्यसमितिको बैठक आज बस्दैछ। बैठक १४औँ महाधिवेशनबाट निर्वाचित कार्यसमितिको हो, जसलाई निवर्तमान कार्यवाहक सभापति पूर्णबहादुर खड्काले आह्वान गरेका हुन्।
बैठक धुम्बाराहीस्थित स्मार्ट पार्टी प्यालेसमा बिहान ११ बजे बस्ने तय गरिएको छ। बैठकमा पार्टीभित्र देखिएको आन्तरिक विवाद, विशेषगरी गत पुसमा सम्पन्न विशेष महाधिवेशनलाई अस्वीकार गर्ने प्रदेश कार्यसमिति सभापतिहरूलाई समेत बोलाइएको छ।
यसले कांग्रेसभित्रको आन्तरिक समीकरण मिलाउने प्रयासका रूपमा हेरिएको छ। लामो समयदेखि देखिएको गुटगत असन्तुष्टि समाधान गर्न नेतृत्वले पहल थालेको संकेत पनि बैठकले दिने अपेक्षा गरिएको छ।
यस्तै, खड्काले आगामी बिहीबार जिल्ला सभापतिहरूको भेला पनि बोलाएका छन्। उक्त भेलामार्फत पार्टी संगठन सुदृढीकरण, आगामी रणनीति तथा आन्तरिक एकता मजबुत बनाउने विषयमा थप छलफल हुने जनाइएको छ।
कांग्रेसभित्र विकसित पछिल्लो राजनीतिक घटनाक्रमले पार्टीभित्रको शक्ति सन्तुलन र नेतृत्वको आगामी कदमलाई चासोका साथ हेरिएको छ।
