गण्डकी, पोखरा — पर्यटकीय नगरी पोखराको लेकसाइड क्षेत्रमा सञ्चालनमा रहेका केही स्पा सेन्टरहरूमा बालिकाहरूलाई काममा लगाइएको गम्भीर आरोपपछि प्रहरीले आइतबार व्यापक कारबाही गरेको छ। जिल्ला प्रहरी कार्यालय, कास्कीले मापदण्डविपरीत सञ्चालन भइरहेका स्पा सेन्टरमाथि छापा मार्दै ८ जना सञ्चालकलाई पक्राउ गरेको हो।
पक्राउ पर्नेहरूमा पोखरा महानगरपालिका–६ लेकसाइडका ४७ वर्षीय होमबहादुर बुढाथोकी, २४ वर्षीया जेनिशा श्रेष्ठ सुनार, २३ वर्षीया शर्मिला परियार, ४२ वर्षीय सुरेश विक, २७ वर्षीय जीवन श्रेष्ठ, ३० वर्षीया अप्रिना खातुन, ४४ वर्षीय राजु थापामगर तथा पोखरा–१७ का २८ वर्षीय सरोज सुनार रहेका छन्।
जिल्ला प्रहरी कार्यालय, कास्कीका प्रहरी नायब उपरीक्षक हरिबहादुर बस्नेतका अनुसार ती स्पा सेन्टरहरूमा सरकारी मापदण्ड विपरीत सेवा सञ्चालन गरिएको, बालिकाहरूलाई श्रमिकका रूपमा प्रयोग गरिएको तथा भित्रै अवाञ्छित गतिविधि हुने/गराउने गरिएको प्रारम्भिक अनुसन्धानबाट खुलेको छ।
प्रहरीले गरेको छापामार कारबाहीका क्रममा केही बालिकाहरूको उद्धार गरिएको र उनीहरूलाई परिवार तथा आफन्तको जिम्मा लगाइएको जानकारी पनि प्रहरीले दिएको छ। उद्धार गरिएका बालिकाहरूको अवस्था तथा उनीहरू कसरी उक्त कार्यमा संलग्न हुन पुगे भन्नेबारे थप अनुसन्धान भइरहेको छ।
यस घटनाले पर्यटकीय क्षेत्र लेकसाइडमा सञ्चालन भइरहेका स्पा तथा मनोरञ्जन व्यवसायप्रति पुनः प्रश्न उठाएको छ। स्थानीयवासी तथा सरोकारवालाहरूले यस्ता व्यवसायमा कडाइका साथ अनुगमन गर्नुपर्ने माग गरेका छन्।
प्रहरीले पक्राउ परेकामाथि मानव बेचबिखन, बाल श्रम शोषण तथा अन्य सम्बन्धित कसुरअन्तर्गत अनुसन्धान अघि बढाएको जनाएको छ। साथै, यस क्षेत्रमा यस्ता गैरकानुनी गतिविधि रोक्न थप निगरानी बढाइने समेत प्रहरीले स्पष्ट पारेको छ।
