काठमाडौं — केपी शर्मा ओली लाई पक्राउपछि स्वास्थ्य परीक्षणका लागि त्रिवि शिक्षण अस्पताल लगिएको छ।
प्रहरीका अनुसार उहाँलाई जिल्ला प्रहरी परिसर काठमाडौं बाट आवश्यक स्वास्थ्य जाँचका लागि अस्पताल पुर्याइएको हो। पक्राउपछि कानुनी प्रक्रिया अनुसार स्वास्थ्य परीक्षण गरिनु पर्ने भएकाले उहाँलाई अस्पताल लगिएको जनाइएको छ।
यसअघि शनिवार बिहान भक्तपुरको सूर्यविनायक नगरपालिका–७ गुण्डुस्थित भाडाको घरबाट प्रहरी टोलीले उहाँलाई नियन्त्रणमा लिएको थियो। पक्राउको क्रममा सुरक्षा सतर्कता बढाइएको थियो भने आसपासका क्षेत्रमा पनि निगरानी कडा पारिएको थियो।
सरकारले गत भदौ २३ गते भएको जेनजी आन्दोलन का क्रममा १९ जनाको ज्यान जाने घटनामा संलग्नताको आरोपमा अनुसन्धान गर्नुपर्ने आवश्यकता देखिएको भन्दै ओलीलाई पक्राउ गरेको जनाएको छ। उक्त आन्दोलनका क्रममा देशभर तनावपूर्ण अवस्था सिर्जना भएको थियो भने विभिन्न स्थानमा झडप, तोडफोड र मानवीय क्षतिको घटना भएको थियो।
प्रहरी स्रोतका अनुसार घटनासम्बन्धी फौजदारी अनुसन्धान अघि बढाउन आवश्यक प्रमाण संकलन, बयान र अन्य कानुनी प्रक्रिया अगाडि बढाइने तयारी भइरहेको छ। यस विषयमा थप अनुसन्धान जारी रहेको र अन्य सम्भावित संलग्न व्यक्तिहरूमाथि पनि अनुसन्धानको दायरा विस्तार हुन सक्ने बताइएको छ।
यस घटनाले नेपालको राजनीतिक वृत्तमा तरंग ल्याएको छ। एक पूर्व प्रधानमन्त्री पक्राउ पर्नु असाधारण घटना मानिएको छ भने सत्तापक्ष र प्रतिपक्षबीच आरोप–प्रत्यारोपको अवस्था सिर्जना भएको छ।
यसैबीच, मानवअधिकारकर्मी तथा विभिन्न राजनीतिक दलहरूले निष्पक्ष अनुसन्धान र कानुनी प्रक्रिया पारदर्शी रूपमा अगाडि बढाउन माग गरेका छन्। सरकारले भने कानूनअनुसार दोषीलाई कारबाही गरिने स्पष्ट पारेको छ।
