काठमाडौं । ठमेल पर्यटन विकास परिषदका अध्यक्ष ध्रुव अधिकारीले नेकपा एमाले परित्याग गर्दै राष्ट्रिय स्वतन्त्र पार्टी (रास्वपा) प्रवेश गर्ने संकेत गरेका छन्।
आइतबार सामाजिक सञ्जाल फेसबुकमार्फत सार्वजनिक धारणा राख्दै अधिकारीले एमालेसँगको आफ्नो लामो राजनीतिक यात्रा टुंग्याएको जानकारी दिएका हुन्। एमालेका सक्रिय नेतासमेत रहेका उनले अब नयाँ सोच, नयाँ दृष्टिकोण र फरक मान्यताका साथ जीवनको नयाँ अध्याय सुरु गर्ने निर्णय गरेको उल्लेख गरेका छन्।
उनले आफ्नो राजनीतिक यात्रामा साथ, सहयोग र समर्थन गर्ने सबैप्रति आभार व्यक्त गर्दै अब परिवर्तनको बाटो रोज्ने निष्कर्षमा पुगेको बताएका छन्। अधिकारीले आफूले देश र समाजका लागि अझ प्रभावकारी ढंगले योगदान दिन सक्ने विश्वासका साथ नयाँ राजनीतिक गन्तव्य रोज्न लागेको जनाएका छन्।
उनको यो अभिव्यक्तिलाई रास्वपा प्रवेशको स्पष्ट संकेतका रूपमा हेरिएको छ। स्रोतका अनुसार उनी छिट्टै औपचारिक रूपमा रास्वपामा प्रवेश गर्ने तयारीमा रहेका छन्।
