भोजपुर । लामो समयदेखिको खडेरीपछि परेको हिउँदे वर्षाले भोजपुर का किसानमा उत्साह र खुसी छाएको छ। समयमै पानी नपर्दा बाली सुक्ने चिन्तामा रहेका किसान वर्षासँगै राहत महसुस गर्न थालेका हुन्।
विशेषगरी गहुँ, मकै, आलु तथा विभिन्न तरकारी बालीका लागि यो वर्षा अत्यन्त उपयोगी बनेको टेम्केमैयुङ गाउँपालिका–५ का स्थानीय किसान अडिबहादुर विष्ट ले बताए। उनका अनुसार खडेरीका कारण हिउँदे बाली सुक्दै गएको अवस्थामा परेको वर्षाले किसानमा नयाँ आशा पलाएको छ।
‘लामो समयको खडेरीका कारण हिउँदे बाली सुक्ने अवस्थामा पुगेको थियो,’ उनले भने, ‘वर्षा भएपछि हामी किसान निकै खुसी भएका छौँ। अब बाली सप्रिन्छ भन्ने आशा बढेको छ।’
खेतबारीमा चिस्यान अभावका कारण ओइलिन थालेका बाली वर्षापछि पुनः हरियाली देखिन थालेका छन्। यसले उत्पादनमा वृद्धि हुने अपेक्षा किसानले गरेका छन्। सिँचाइ सुविधा नपुगेका क्षेत्रका किसानका लागि त यो वर्षा झन् राहत बनेको छ।
स्थानीय किसानका अनुसार वर्षाअघि माटो अत्यधिक सुक्खा हुँदा बालीको वृद्धि प्रक्रिया प्रभावित बनेको थियो। तर, वर्षाले माटोमा आवश्यक चिस्यान उपलब्ध गराएपछि बालीको वृद्धि पुनः सक्रिय भएको छ।
यसले उत्पादन मात्र नभई बालीको गुणस्तरमा समेत सुधार आउने विश्वास किसानले व्यक्त गरेका छन्। विशेषगरी मकै छर्ने ‘सिजन’मै पानी परेपछि किसानलाई थप सहजता भएको छ।
