काठमाडौं । रङहरूको पर्व होली मंगलबार तराई–मधेशका जिल्लामा हर्षोल्लासका साथ मनाइँदैछ ।
काठमाडाैं उपत्यकासहित हिमाली र पहाडी जिल्लामा होली मनाइएको भोलिपल्ट तराईमा होली अर्थात् फागु पर्व मनाउने प्रचलन रहेको छ । झापा, मोरङ, सुनसरी, सप्तरी, सिराहा, उदयपुर, धनुषा, महोत्तरी, सर्लाही, रौतहट, बारा, पर्सा, नवलपरासी, रुपन्देही, कपिलवस्तु, दाङ, बाँके, बर्दिया, कैलाली र कञ्चनपुरलगायत तराईका जिल्लामा धुमधामका साथ होली खेल्ने गरिन्छ ।
होली पर्वलाई लक्षित गर्दै सरकारले मंगलबार तराई–मधेश क्षेत्रमा सार्वजनिक बिदा दिएको छ ।
यस अवसरमा सुरक्षा निकाय र जिल्ला प्रशासन कार्यालयहरूले मर्यादित तथा सुरक्षित रूपमा होली मनाउन आग्रह गरेका छन् । आत्मीयजनसँग घरभित्रै होली खेल्न, कसैको इच्छाविपरीत रङ नदल्न, लोला नहान्न, छाला तथा आँखामा असर पर्ने केमिकलयुक्त रङ प्रयोग नगर्न, मदिरा सेवन नगर्न तथा ट्राफिक नियमको पूर्ण पालना गर्न आग्रह गरिएको छ ।
