काठमाडाैं । **केपी शर्मा ओली**ले झापा–५ मा चुनावी घरदैलो कार्यक्रमका क्रममा धिमाल सांस्कृतिक संग्रहालयको अवलोकन गर्नुभएको छ।
अवलोकनका क्रममा स्थानीय बासिन्दा तथा संग्रहालय व्यवस्थापन समितिसँग छलफल गर्दै उहाँले संग्रहालयको विकास र स्तरोन्नतिका लागि आफ्नो प्रतिबद्धता व्यक्त गर्नुभयो। आफू नेतृत्वमा रहेको सरकारका बेला संग्रहालयका लागि विनियोजन गरिएको बजेट वर्तमान सरकारले कटौती गरेको भन्दै उहाँले असन्तुष्टि जनाउनुभयो।
नेपाल कम्युनिस्ट पार्टी (एमाले) विकासप्रेमी पार्टी भएको दाबी गर्दै अध्यक्ष ओलीले देश निर्माणका लागि सबै पक्षबाट रचनात्मक सल्लाह र सुझाव आवश्यक रहेको बताउनुभयो।
उहाँले धिमाल जातिको मौलिक संस्कृति संरक्षणमा संग्रहालयले महत्वपूर्ण भूमिका खेल्ने उल्लेख गर्दै यसको दीर्घकालीन विकासका लागि आफू सधैं तत्पर रहने प्रतिबद्धता व्यक्त गर्नुभयो।
